राजन कुमार बानिया
वीरगंज, २८ फागुन । निर्वाचन क्षेत्र नम्बर–२ र ४ बाट नवनिर्वाचित सांसद सुशील कुमार कानु र टेकबहादुर शाक्यले वीरगंजस्थित मानव सेवा आश्रम पुगेर त्यहाँ आश्रय लिइरहेका असहाय तथा बेसहारा नागरिकहरूको अवस्थाबारे जानकारी लिएका छन।
बिहीबार बिहान पर्सा–४ का नवनिर्वाचित सांसद टेकबहादुर शाक्यसहित आश्रम पुगेका सांसद कानुले आश्रममा आश्रित ६० भन्दा बढी लक्ष्मीनारायणहरू सँगै बसेर बिहानको भोजन ग्रहण गरेका थिए।
आश्रममा आश्रित व्यक्तिहरूसँग प्रत्यक्ष संवाद गर्दै उनीहरूको दैनिक जीवन, आवश्यकताहरू तथा आश्रमले सञ्चालन गरिरहेको सेवामूलक गतिविधिबारे जानकारी लिएको जनाइएको छ सो क्रममा सांसद शाक्यले मानव सेवा आश्रमले समाजका असहाय र बेसहारा नागरिकहरूको संरक्षणका लागि गर्दै आएको सेवामूलक कार्यको प्रशंसा गर्दै आफ्नो व्यक्तिगत तर्फबाट १ लाख ११ हजार १ सय ११ रुपैयाँ आर्थिक सहयोग प्रदान गर्ने घोषणा गरेका छन्।
कार्यक्रममा राष्ट्रिय स्वतन्त्र पार्टीका युवा नेता सुधिर पटेल, आश्रमका संरक्षक तथा मधेस विश्व विद्यालयका उपकुलपति प्रा.डा. दिपक शाक्य, आश्रमका संस्थापक देवेश गुप्ता, सामाजिक अभियन्ता प्रकाश थारू लगायतको उपस्थिति रहेको थियो। मानव सेवा आश्रमले सडकपेटी तथा बेसहारा अवस्थामा रहेका नागरिकहरूको उद्धार गरी उनीहरूलाई आश्रय, भोजन, उपचार र संरक्षण प्रदान गर्दै आएको सामाजिक संस्था हो।
