वीरगंज, ८ फागुन । जिल्ला प्रशासन कार्यालय पर्साले वीरगंजमा बिहान ६ बजेदेखि १० बजेसम्म चार घण्टाका लागि कफ्र्यू आदेश खुला गरेको छ ।
सर्वसाधारणको दिनचर्या सहज बनाउन कफ्र्यू आदेश चार घण्टाका लागि खुला गरिएको जिल्ला प्रशासन कार्यालय पर्साले जनाएको छ ।
आज बिहान विज्ञप्ति जारी गर्दै पर्साका प्रमुख जिल्ला अधिकारी दिनेशसागर भुषालले मगलवार बिहान ६ बजेदेखि १० बजेसम्मका लागि कफ्र्यू आदेश खुला गरिएको जनाए । उक्त समयपश्चात स्थानीय प्रशासन ऐन २०२८ को दफा ६ (क) बमोजिम जारी गरिएको कफ्र्यू आदेश रहने प्रजिअ भुषालले जारी गरेको सूचनामा उल्लेख छ ।
वीरगंज महानगरपालिकाको पूर्वमा नगवा चोक (बारा जिल्ला सिमाना), पश्चिममा तिलावे पुल, उत्तरमा परवानीपुर पर्सा र दक्षिणमा मितेरीपुल (भन्सार क्षेत्र) सम्म कफ्र्यू लगाएको हो ।