अभिलाष गुप्ता
वीरगंज, २६ मंसिर । वीरगंज, आदर्शनगरस्थित श्री राणी सती अतिथि सदनको परिसरमा आयोजित संगीतमय श्रीमद्भागवत कथा भक्तिमय वातावरणमा सम्पन्न भएको छ ।
पुणित भावना सहित आयोजना गरिएको यस पाँचदिने धार्मिक कार्यक्रम शुक्रबार साँझ ७ बजे विधिवत् रूपमा सम्पन्न भएको आयोजक समितिले जानकारी दिएको छ ।
कार्यक्रम अन्तर्गत नित्य वेदी पूजन बिहान ८ बजेबाट सुरु हुने र कथा वाचन तथा भजन–कीर्तन साँझ ४ बजेबाट प्रारम्भ हुने व्यवस्था गरिएको थियो । समापनका दिन २०८२ मंसिर २६ गते साँझ ७ बजे कथा विश्रामसँगै महाप्रसाद वितरण गरिएको थियो ।
कार्यक्रममा भारतका प्रसिद्ध कथा वाचक श्री मधुकर जी द्वारा श्रीमद्भागवत कथा वाचन तथा भक्तिभावपूर्ण भजन–कीर्तन प्रस्तुत गरिएको थियो। त्यस्तै, स्वामी राजीव रंजनको पावन सान्निध्य र विशेष उपस्थितिले कार्यक्रमलाई अझ अध्यात्मिक र ऊर्जाशील बनाएको सहभागीहरूले बताए ।
वीरगंजका सर्वसाधारण, श्रद्धालु भक्तजन तथा विभिन्न सामाजिक–धार्मिक संस्थाका प्रतिनिधिहरूको उल्लेखनीय उपस्थिति रहेको आयोजकले जनाएको छ । पाँच दिनसम्म निरन्तर सञ्चालन भएको उक्त कथा भक्तिभाव, संस्कृति र आध्यात्मिक चेतनाको समन्वयका रूपमा सफल रूपमा सम्पन्न भएको आयोजक श्रीमद्भागवत आयोजक मूल समितिद्वारा जानकारी गराइएको छ ।
