अभिलाष गुप्ता
वीरगंज, २९ मंसिर । राष्ट्रिय स्वतन्त्र पार्टीको प्रथम वीरगंज महानगरपालिका भेला आज भव्य तथा सफलतापूर्वक सम्पन्न भएको छ । पार्टीका केन्द्रीय अध्यक्ष डी.पी. अर्यालको प्रमुख आतिथ्यतामा सम्पन्न उक्त भेलामा संगठन विस्तार, समसामयिक राजनीतिक अवस्था र भावी कार्यदिशाबारे विस्तृत छलफल गरिएको थियो ।
भेलालाई सम्बोधन गर्दै अध्यक्ष अर्यालले राष्ट्रिय स्वतन्त्र पार्टी जनताको आवाज बोकेको नयाँ र वैकल्पिक राजनीतिक शक्ति भएको उल्लेख गर्नुभयो । उहाँले पारदर्शिता, सुशासन र जवाफदेहितालाई केन्द्रमा राखेर राजनीति अघि बढाउने पार्टीको मूल प्रतिबद्धता दोहोर्याउँदै स्थानीय तहबाटै संगठन मजबुत बनाएर देशभर पार्टीलाई सुदृढ बनाउने आवश्यकता औँल्याउनुभयो ।
कार्यक्रममा पार्टीका केन्द्रीय, प्रदेश तथा जिल्ला तहका नेता–कार्यकर्ताहरूको उल्लेखनीय सहभागिता रहेको थियो। सहभागी वक्ताहरूले वीरगंज महानगर क्षेत्रमा पार्टीको भूमिका अझ प्रभावकारी बनाउने, जनसमस्यामा केन्द्रित राजनीति गर्ने तथा आगामी दिनमा जनसरोकारका कार्यक्रमहरू सञ्चालन गर्ने विषयमा आ–आफ्ना धारणा व्यक्त गरेका थिए।
भेलाले वीरगंज महानगरपालिका स्तरमा संगठनलाई व्यवस्थित, अनुशासित र सशक्त बनाउँदै अघि बढ्ने निर्णयसमेत गरेको छ। साथै संगठनात्मक जिम्मेवारी विस्तार गर्दै वीरगन्ज महानगर कमिटीको सिफारिसमा मधेस प्रदेश सदस्य पदमा दिपराज पटेल चयन गरिएको जानकारी पनि कार्यक्रममा दिइएको थियो।
कार्यक्रम सौहार्दपूर्ण तथा उत्साहजनक वातावरणमा सम्पन्न भएको आयोजकले जनाएको छ।
