अभिलाष गुप्ता
वीरगंज, ०८ पुस । पाँचौँ संस्करणको नेशनल इन्फोटेक अन्तरकलेज टी–२० क्रिकेट कप (एनआइ कप) अन्तर्गत छैटौँ दिनको पहिलो खेलमा ग्लोबल बिजनेस कलेजले वीरगञ्ज इन्स्टिच्युट अफ टेक्नोलोजी (बीआइटी) लाई १०० रनको फराकिलो अन्तरले पराजित गर्दै लगातार दोस्रो जीत दर्ता गरेको छ ।
वीरगञ्जस्थित टिबी शाह (नारायणी) क्रिकेट मैदानमा टस जितेर पहिले ब्याटिङ गरेको ग्लोबलले २० ओभरमा २ विकेटको क्षतिमा १८३ रन बनायो । ओपनर रविन्द्र सिंह कुँवरले अविजित ८३ रनको उत्कृष्ट पारी खेले भने शुभम् बरालले ३३ र रबिन मण्डलले ४४ रनको योगदान दिए ।
१८४ रनको लक्ष्य पछ्याएको बीआइटी १९.३ ओभरमै ८३ रनमा अलआउट भयो। बीआइटीका लागि मरुफ अन्सारीले २२ र निखिल पटेलले १७ रन बनाए। बलिङतर्फ ग्लोबलका अनुज ठाकुरले ५ विकेट लिँदै शानदार प्रदर्शन गरे ।
यसअघि ग्लोबलले ओम नेशनल एकेडेमीलाई पनि ठूलो अन्तरले पराजित गरेको थियो । प्रतियोगिताअन्तर्गत हाल आयोजक नेशनल इन्फोटेक कलेज र हेटौँडा स्कुल अफ म्यानेजमेन्टबीच प्रतिस्पर्धा जारी छ ।
एनआइ कप तराई–मधेस क्षेत्रकै लोकप्रिय अन्तरकलेज टी–२० क्रिकेट प्रतियोगिताका रूपमा स्थापित हुँदै आएको छ, जसमा पर्सा, बारा र मकवानपुरका १० कलेज सहभागी छन् ।
