अभिलाष गुप्ता
वीरगंज, १२ पुष । वीरगंज महानगरपालिका वडा नं. ३१ बेलवामा महानगरपालिकाका उपप्रमुख इम्तियाज आलमले आफ्नो कोषबाट भइरहेको विकास निर्माण कार्यको स्थलगत अनुगमन गर्नुभएको छ । उपप्रमुख आलमले बेलवामा भइरहेको सडक ढलान तथा रामजानकी मन्दिरको प्रखाल निर्माण कार्यको अवलोकन गर्नुभएको हो ।
केही महिना अघि रामजानकी मन्दिर व्यवस्थापन समितिले उपप्रमुख आलमसमक्ष प्रखाल निर्माणका लागि प्रस्ताव राखेपछि उहाँले सहयोग गर्ने प्रतिबद्धता व्यक्त गर्नुभएको थियो। सोही प्रतिबद्धताअनुसार प्रखाल निर्माण सम्पन्न भएपछि स्थानीय बासिन्दाहरू हर्षित भएका छन् ।
यस अवसरमा रामजानकी मन्दिर व्यवस्थापन समितिले एक कार्यक्रमको आयोजना गरेको थियो, जसको प्रमुख अतिथित्व उपप्रमुख इम्तियाज आलमले गर्नुभएको थियो । कार्यक्रममा मन्तव्य राख्दै उपप्रमुख आलमले आफू सधैं जनताको साथमा रहेको, आपसी सद्भाव, भाईचारा र सहकार्यबाट समाज अघि बढिरहेको बताउनुभयो । साथै रामजानकी मन्दिरलाई आवश्यक सहयोग गर्न आफू सधैं तयार रहेको उहाँले उल्लेख गर्नुभयो ।
कार्यक्रमको सभापतित्व पूर्व गाउँपालिका अध्यक्ष जोखन दासले गर्नुभएको थियो भने अतिथिहरूमा नेपाली कांग्रेस क्षेत्र नं. २ का सचिव हरि यादव, वडा नं. ३१ का वडा अध्यक्ष जितेन्द्र यादव, हैदर अंसारी, शेख अमरुल हसनलगायत स्थानीयहरूको उल्लेखनीय उपस्थिति रहेको थियो ।
