अभिलाष गुप्ता
वीरगंज, १३ पौष । पटेर्वा सुगौली गाउँपालिका उपाध्यक्ष ममता महतोको अध्यक्षतामा विद्यालय बाहिर रहेका दलित बालबालिकाको शिक्षामा पहुँच सुनिश्चित गर्ने उद्देश्यले पालिका स्तरीय समन्वय तथा सहकार्य कार्यक्रम सम्पन्न भएको छ । दलित महिला संघ पर्साको सहजीकरणमा सञ्चालित उक्तकार्यक्रम शिक्षामा वकालत अभियान (CSE) अन्तर्गत आयोजना गरिएको हो ।
जातीय र लैंगिक भेदभाव विरुद्ध संघर्ष गर्दै न्यायपूर्ण समतामूलक समाज निर्माण गर्नु भन्ने मूल नारासहित सम्पन्न कार्यक्रम पटेर्वा सुगौली गाउँपालिकाको बैठक हलमा आयोजना गरिएको थियो । कार्यक्रममा विद्यालयका प्रधानाध्यापक, जनप्रतिनिधि, समाजसेवी तथा सरोकारवाला निकायका प्रतिनिधिहरूको सहभागिता रहेको थियो। कार्यक्रममा कुल ३६ जनाको उपस्थिति रहेको आयोजकले जनाएको छ ।
दलित महिला संघ पर्साकी अध्यक्ष निला रामको विशेष उपस्थितिमा सम्पन्न कार्यक्रममा विद्यालय बाहिर रहेका बालबालिकालाई औपचारिक शिक्षाको पहुँचमा ल्याउन स्थानीय तह, विद्यालय र समुदायबीच प्रभावकारी समन्वय आवश्यक रहेकोमा जोड दिइएको थियो ।
सहभागीहरूले शिक्षामा पहुँच अभिवृद्धिका लागि सामूहिक पहल, सचेतना र सहकार्यलाई थप सुदृढ बनाउने प्रतिबद्धता व्यक्त गरेका छन् । कार्यक्रमको समन्वय पटेर्वा सुगौली गाउँपालिका तथा सहकार्य कारखाना समूहले गरेको थियो भने कार्यक्रमको आयोजना दलित महिला संघले गरेको हो ।
