वीरगंज, १३ माघ । वीरगंज उद्योग वाणिज्य संघले मंगलवार प्रेस विज्ञप्ति जारी वीरगंज बजार क्षेत्रमा पछिल्लो समय फाटफुट रूपमा नक्कली नेपाली रुपियाँका नोटहरू देखिन थालेकोप्रति गम्भीर ध्यानाकर्षण भएको जनाएको छ ।
संघका अध्यक्ष हरिप्रसाद गौतमले जारी गर्नुभएको विज्ञप्तिमा यस सम्बन्धमा समयमै सचेत नहुने हो भने भविष्यमा यसले गम्भीर तथा विकराल रूप लिन सक्ने सम्भावना रहेको जनाएको छ ।
विज्ञप्तिमा यस परिस्थितिलाई मध्यनजर गर्दै सम्पूर्ण उद्योगी, व्यवसायी तथा सर्वसाधारणलाई नगद रुपियाँको कारोबार गर्दी विशेष सतर्कता अपनाई नोटहरू राम्ररी जाँच गरेर मात्र कारोवार गर्न अनुरोध गरिएको छ । साथै सम्भव भएसम्म नगद कारोबारको सट्टा विद्युतीय (डिजिटल) माध्यममार्फत कारोवार गर्न सबैमा आग्रह गरिएको छ ।
बैंक नोट कागज जस्तो चिप्लो लागेमा वा बैंक नोटको रङ्ग गाढा वा फिक्का जस्तो लागेमा वा सेतो ठूलो भाग प्रकाशतर्फ पारेर हेर्दा कोरेको जस्तो लालीगुराँस देखिएमा वा सुरक्षण धागो रङ्गले पोतेको, बाहिरबाट टाँसेको र सामान्यभन्दा फरक देखिएमा वा उठ्नुपर्ने भागहरू चिप्लो र सम्म भएको जस्तो लागेमा हेरेर, छामेर र ढल्काएर नोट असली वा नक्कली भनेर छुट्टयाउन सकिने भनि नेपाल राष्ट्र बैंकबाट जारी परिपत्रमा जनाइएको छ ।
नक्कली नोटको प्रयोगले आर्थिक अपराध वृद्धि हुनुका साथै व्यक्तिगत तथा संस्थागत क्षति हुन सक्ने भएकाले सबै पक्ष सचेत र जिम्मेवार बन्न हुन संघ यसै विज्ञप्तिमार्फत जानकारी गराइएको छ ।