वीरगंज,२९माघ । पर्साको पकाहामैनपुर गाउँपालिका वडा नम्बर–४ मा नेकपा एमालेको घरदैलो अभियान तथा मतदाता भेटघाट कार्यक्रम उत्साहपूर्ण रूपमा सम्पन्न भएको छ। कार्यक्रममा स्थानीयवासीको उल्लेखनीय सहभागिता देखिएको थियो।
मतदाता भेटघाटका क्रममा पर्सा निर्वाचन क्षेत्र नम्बर–३ बाट प्रतिनिधिसभा सदस्यका उम्मेदवार रूपेश कुमार पाण्डेले राष्ट्र र राष्ट्रियताको रक्षा, राजनीतिक स्थिरता तथा समृद्धिका लागि नेकपा एमालेको नेतृत्वमा सरकार आवश्यक रहेको बताए। उनले वर्तमान राजनीतिक अस्थिरता अन्त्य गरी विकासलाई तीव्रता दिन एमाले सक्षम शक्ति भएको दाबी गरे।
“राष्ट्र बलियो भए मात्र क्षेत्र बलियो हुन्छ,” उनले भने, “पर्सा–३ लाई कृषि, उद्योग, रोजगारी र पूर्वाधार विकासको केन्द्र बनाउने स्पष्ट योजना लिएर आएको छु।”
कार्यक्रममा सहभागी मतदाताहरूले पाण्डेको विकास दृष्टिकोणको प्रशंसा गर्दै फागुन २१ गते हुने प्रतिनिधिसभा निर्वाचनमा उनलाई विजयी गराउने प्रतिबद्धता व्यक्त गरेका थिए। जिल्लाका नेता तथा कार्यकर्ताहरूको सक्रिय उपस्थितिले कार्यक्रमलाई थप ऊर्जा प्रदान गरेको थियो। आगामी दिनमा घरदैलो अभियानलाई अझ तीव्र बनाउने एमालेको तयारी रहेको जनाइएको छ।
