अभिलाष गुप्ता
वीरगंज, ०७ बैशाख । वीरगंज सशस्त्र प्रहरी बल नेपाल नं. १३ गण मुख्यालय, वीरगंजमा १९ औँ स्थापना दिवस तथा वार्षिक उत्सव विशेष समारोहका साथ भव्य रूपमा सम्पन्न भएको छ। आकर्षक सजावटयुक्त मञ्च, पुष्पमालाले सजिएको वातावरण र सुरक्षाकर्मीहरूको उल्लेखनीय उपस्थितिबीच कार्यक्रम गरिमामय रूपमा आयोजना गरिएको थियो।
समारोहका प्रमुख अतिथि सशस्त्र प्रहरी बल मधेश प्रदेश प्रमुख कृष्ण ढकाल रहेका थिए भने कार्यक्रमको अध्यक्षता गणपति मोहन बहादुर क्षेत्रीले गरेका थिए।
कार्यक्रममा प्रमुख जिल्ला अधिकारी, प्रहरी उपरीक्षक सुदीप पाठक लगायत विभिन्न सुरक्षा निकायका प्रतिनिधि, विशिष्ट व्यक्तित्व तथा आमन्त्रित अतिथिहरूको उल्लेखनीय उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि कृष्ण ढकालले सशस्त्र प्रहरी बलले स्थापना कालदेखि नै राष्ट्रको सुरक्षा, सीमा व्यवस्थापन तथा विपद् उद्धारमा महत्वपूर्ण भूमिका निर्वाह गर्दै आएको उल्लेख गरे। उनले भने,सशस्त्र प्रहरी बल केवल सुरक्षा निकाय मात्र नभई राष्ट्रको भरोसाको संस्था हो।
सीमाको रक्षा, शान्ति सुरक्षा कायम र विपद् व्यवस्थापनमा यस संस्थाको योगदान अत्यन्त सराहनीय छ। आगामी दिनमा अझ बढी अनुशासित, जिम्मेवार र प्रविधिमैत्री ढंगले काम गर्न आवश्यक छ।”
ढकालले सुरक्षाकर्मीहरूको समर्पण, त्याग र कर्तव्यनिष्ठा नै संस्थाको सबैभन्दा ठूलो शक्ति भएको उल्लेख गर्दै संगठनभित्र व्यावसायिकता र नैतिकताको उच्च मापदण्ड कायम राख्न आग्रह गरे।
समारोहका क्रममा सशस्त्र प्रहरी बलको इतिहास, उपलब्धि र वर्तमान भूमिकाबारे प्रकाश पारिएको थियो। उत्कृष्ट कार्य गर्ने सुरक्षाकर्मीहरूलाई सम्मान तथा पुरस्कार प्रदान गरिनुका साथै उनीहरूको योगदानको उच्च मूल्यांकन गरिएको थियो।
कार्यक्रमलाई थप आकर्षक बनाउन सांस्कृतिक प्रस्तुति, अनुशासित परेड प्रदर्शन तथा विविध मनोरञ्जनात्मक कार्यक्रमहरू प्रस्तुत गरिएको थियो, जसले उपस्थित दर्शकहरूको मन जित्न सफल भएको थियो।
कार्यक्रममा सहभागीहरूले संगठनप्रति समर्पण, अनुशासन र राष्ट्रसेवाको भावनालाई अझ सुदृढ बनाउने प्रतिबद्धता व्यक्त गर्दै आगामी दिनमा अझ प्रभावकारी सेवा प्रवाह गर्ने अठोट व्यक्त गरेका थिए।
