वीरगंज, ०५ साउन । पर्साको कालिकामाई गाउँपालिका–३ का वडाध्यक्ष संजय पटेललाई गाउँपालिकाका कर्मचारीमाथि कुटपिट तथा दुर्व्यवहार गरेको आरोपमा प्रहरीले पक्राउ गरेको छ।
इलाका प्रहरी कार्यालय पोखरियाको टोलीले वडाध्यक्ष पटेललाई उनकै गाउँ कालिकामाई गाउँपालिका–३ हरिहरपुर बिर्ताबाट नियन्त्रणमा लिएको हो। प्रहरीका अनुसार गाउँपालिकाका एक कर्मचारीमाथि कार्यालयभित्रै कुटपिट भएको घटनामा अभद्र व्यवहारसम्बन्धी मुद्दाअन्तर्गत उनलाई पक्राउ गरिएको हो।
प्रहरीले घटनामा संलग्न अन्य व्यक्तिहरूको खोजी तथा अनुसन्धान जारी रहेको जनाएको छ। पक्राउ परेका वडाध्यक्षलाई आवश्यक कानुनी प्रक्रिया अगाडि बढाउन जिल्ला प्रशासन कार्यालयमा उपस्थित गराउने तयारी गरिएको प्रहरीले जानकारी दिएको छ।
गत असार २३ गते गाउँपालिकाका कम्प्युटर अपरेटर चन्दन कुमार चौरसियामाथि गाउँ कार्यपालिकाको कार्यालयभित्रै कुटपिट तथा दुर्व्यवहार भएको आरोप लागेको थियो। कार्यालय समयमै आफ्नो जिम्मेवारी निर्वाह गरिरहेका कर्मचारीमाथि योजनाबद्ध रूपमा आक्रमण भएको भन्दै गाउँपालिकाका कर्मचारीहरूले दोषीमाथि कानुनी कारबाहीको माग गर्दै आन्दोलन समेत गरेका थिए।
घटनापछि कालिकामाई गाउँपालिकाका सम्पूर्ण कर्मचारी आन्दोलित हुँदै दोषीमाथि कडा कारबाहीको माग गरिरहेका थिए। कर्मचारीहरूको आन्दोलन र उजुरीका आधारमा प्रहरीले अनुसन्धान अघि बढाउँदै वडाध्यक्ष पटेललाई पक्राउ गरेको जनाएको छ।
