अभिलाष गुप्ता
वीरगंज, ११ साउन । वीरगंज महानगरपालिका–२४, ज्योतिनगरस्थित लिटिल एन्जल्स बोर्डिङ स्कुलमा अध्ययनरत विद्यार्थीहरूलाई लक्षित गरी जल संरक्षण सम्बन्धी अभिमुखीकरण कार्यक्रम सम्पन्न भएको छ।

युनिसेफ नेपाल तथा सामाजिक संस्था जिल्ला समन्वय समुदाय (SODCC) को संयुक्त आयोजनामा सम्पन्न कार्यक्रममा प्रशिक्षक अजय पटेल र श्रीमती मधु चौहानले विद्यार्थीहरूलाई पानीको महत्व, जलस्रोतको संरक्षण, वर्षाको पानी संकलन, पानीको दुरुपयोग रोक्ने उपाय तथा दैनिक जीवनमा पानीको मितव्ययी प्रयोगबारे जानकारी गराउनुभएको थियो।उहाँहरूले जलवायु परिवर्तन, बढ्दो पानीको अभाव तथा भावी पुस्ताका लागि स्वच्छ पानीको उपलब्धता सुनिश्चित गर्न सबैले पानी संरक्षणमा जिम्मेवार बन्नुपर्ने आवश्यकता औँल्याउनुभयो। साथै, घर, विद्यालय तथा समुदायस्तरबाटै पानी बचाउने बानीको विकास गर्न विद्यार्थीहरूलाई प्रेरित गर्नुभयो।

कार्यक्रममा विद्यार्थीहरूले समेत जल संरक्षणसँग सम्बन्धित जिज्ञासा राखेका थिए भने प्रशिक्षकहरूले त्यसका व्यावहारिक समाधानबारे जानकारी दिएका थिए। सहभागी विद्यार्थीहरूले कार्यक्रमलाई ज्ञानवर्द्धक र उपयोगी भएको प्रतिक्रिया दिएका थिए।

कार्यक्रम विद्यालयका प्रिन्सिपल सन्नी पाख्रिनको अध्यक्षतामा सम्पन्न भएको थियो। विद्यालय परिवारले यस्ता सचेतनामूलक कार्यक्रमले विद्यार्थीमा वातावरण संरक्षण तथा जिम्मेवार नागरिक बन्ने संस्कार विकास गर्न महत्वपूर्ण योगदान पुग्ने विश्वास व्यक्त गरेको छ।