अभिलाष गुप्ता
वीरगंज, १४ साउन । प्याब्सन वीरगंजका अध्यक्ष राहुल श्रीवास्तवले सुनसरी जिल्लामा हालै भएको धार्मिक द्वन्द्वको घटनाप्रति गहिरो दुःख व्यक्त गर्दै यसलाई अत्यन्तै चिन्ताजनक र दुर्भाग्यपूर्ण घटना बताएका छन्।
उनले जारी गरेको वक्तव्यमा यस्ता घटनाले नेपाली समाजमा गहिरो रूपमा स्थापित सहिष्णुता, धार्मिक सद्भाव र सहअस्तित्वको भावनामाथि आघात पुग्ने उल्लेख गरेका छन्। नेपाल विविधताभित्रको एकताको अनुपम उदाहरण भएको उल्लेख गर्दै हिन्दु, मुस्लिमलगायत सबै धर्मावलम्बीहरूबीच शताब्दीयौँदेखि कायम रहेको आपसी सम्मान र सहअस्तित्वलाई कुनै पनि परिस्थितिमा कमजोर हुन नदिनुपर्नेमा उनले जोड दिएका छन्।
श्रीवास्तवले भावनामा बगेर वा अफवाहका आधारमा हिंसात्मक गतिविधिमा संलग्न हुनु समाजलाई विघटनतर्फ धकेल्ने कार्य भएको उल्लेख गर्दै सुनसरीको घटनालाई कुनै एक जिल्लाको समस्या मात्र नभई सम्पूर्ण राष्ट्रको सामाजिक संरचनामाथिको चुनौतीका रूपमा लिनुपर्ने बताएका छन्।
घटनामा ज्यान गुमाएका व्यक्तिप्रति हार्दिक श्रद्धाञ्जली अर्पण गर्दै उनले शोकसन्तप्त परिवारप्रति गहिरो समवेदना व्यक्त गरेका छन्। साथै, घटनामा संलग्न जो–कोही दोषी भए पनि उनीहरूलाई कानुनी दायरामा ल्याई कडा कारबाही गर्नुपर्नेमा जोड दिएका छन्। न्याय बिना दिगो शान्ति सम्भव नहुने र दण्डहीनताले यस्ता घटना पुनः दोहोरिने जोखिम बढाउने उनको भनाइ छ।
सरकार तथा सम्बन्धित निकायलाई घटनाको निष्पक्ष, गहिरो र शीघ्र अनुसन्धान गरी सत्यतथ्य सार्वजनिक गर्न तथा दोषीमाथि कानुनबमोजिम कारबाही गर्न उनले आग्रह गरेका छन्। ढिलासुस्ती, राजनीतिकरण वा कमजोरीले समाजमा अविश्वास बढाउने भएकाले राज्यले नागरिकको सुरक्षा र सामाजिक सद्भाव कायम गर्ने आफ्नो जिम्मेवारी प्रभावकारी रूपमा निर्वाह गर्नुपर्ने उनले उल्लेख गरेका छन्।
उनले अहिलेको आवश्यकता विभाजन होइन संवाद, आक्रोश होइन समझदारी भएको उल्लेख गर्दै सामाजिक सञ्जाल वा अफवाहमार्फत फैलाइने घृणा र उत्तेजनाबाट टाढा रहन सबैलाई आग्रह गरेका छन्।
अन्त्यमा अध्यक्ष श्रीवास्तवले सम्पूर्ण हिन्दु तथा मुस्लिम दाजुभाइ–दिदीबहिनीहरूलाई शान्ति, संयमता र आपसी सम्मान कायम राख्न हार्दिक अपिल गर्दै नेपालको शक्ति नै यसको एकता भएको र यही एकताले राष्ट्रलाई स्थायित्व, समृद्धि र उज्ज्वल भविष्यतर्फ अघि बढाउने विश्वास व्यक्त गरेका छन्।
