वीरगंज, २५ साउन ।
पर्सा जिल्लामा हालै सरुवा भई आएका जिल्ला प्रहरी कार्यालय पर्साका प्रमुख प्रहरी उपरीक्षक पवन भट्टराईले मानवसेवा आश्रम वीरगंजमा खाद्यान्न सहयोग गरेका छन् ।
आश्रममा आश्रितहरूका लागि खाद्यान्न सहयोग गर्दै प्रउ भट्टराईले आवश्यक सहयोग र साथ प्रदान गर्न आफू प्रतिबद्ध रहेको बताए । उनले मानवसेवा जस्तो पवित्र अभियानमा राज्यका निकाय, सुरक्षा निकाय तथा समाजका सबै पक्षबीच सहकार्य आवश्यक रहेको धारणा व्यक्त गरे ।
कार्यक्रममा मानवसेवा आश्रम पर्सा, वीरगंजका संरक्षक तथा मधेश विश्वविद्यालयका उपकुलपति प्राडा दीपक शाक्य, वीरगंज उद्योग वाणिज्य संघ वीरगंजका अध्यक्ष आदरणीय हरि गौतम, आश्रम वीरगंजका संस्थापक अभियन्ता देवेश गुप्तालगायतको सहभागिता थियो ।
