भदौ १९,२०८०
वीरगंज १९ भदौं । वीरगंज महानगरपालिकाका मेयर राजेशमान सिंहले आर्थिक नगरीका रुपमा परिचित वीरगन्जलाई आर्थिक रुपमा सबल बनाउनुपर्नेमा जोड दिएका छन् । त्यसका लागि महानगरपालिकाले कामपनि गरीरहेको मेयर सिंहको भनाई छ ।
मंगलवार भारत गुजरातको क्लस्टर पल्स इकोनोमिक डेभलपमेन्टका संस्थापक एंव अध्यक्ष डा. जगत शाहसँग वीरगन्जमा भएको भेटवार्ताका क्रममा मेयर सिंहले आर्थिक क्षेत्रको सुधार बिना अन्य क्षेत्रमा विकास गर्न नसकिने धारणा पनि राखे । औद्योगिक एंव आर्थिक नगरी वीरगन्जमा डा.शाहलाई स्वागत गर्दै मेयर सिंहले समृद्धि र विकासका लागि आर्थिक,भौतिक एंव नीतिगत सहयोग र सहकार्यका लागि महानगर तयार रहेको पनि बताए ।
त्यस अवसरमा डा. शाहले पनि भारतको तर्फबाट दीगो उपलब्धी हुने खालका योजनामा लगानी गर्न तयार रहेको बताउँदै त्यसको लागि वातावरण निर्माण गर्न मेयर सिंहसंग आग्रह गरे । नेपाल र भारतबीचको रोटीबेटीको सम्बन्ध रहेको स्मरण गराउदै उनले भारतीय लगानी ल्याउने वातावरण बनाउनुपर्ने आवश्यक्ता औंल्याए ।
त्यस अवसरमा वरिष्ठ पत्रकार चन्द्रकिशोर,उद्योगपति अशोक बैद्य,भारतीय महावाणिज्य दूतावासका कर्मचारी लगायतको पनि उपस्थिती थियो ।
