वीरगंज, २७ मंसिर । जिल्ला प्रहरी कार्यालय बाराले १५ कठ्ठा खेतमा लगाएको अबैध गाँजा खेती फँडानी गरेको छ ।
इलाका प्रहरी कार्यालय निजगढले निजगढ नगरपालिका वडा नं. ११ रतनपुर स्थित १५ कठ्ठा खेतमा अवैध रूपमा लगाएको गाँजाको १८ हजार बोटहरू फडानी गरी नरुट गरेको तथा गाँजा खेतीमा सलंग्न व्यक्तिहरूको खोजतलास गरीरहेको जिल्ला प्रहरी कार्यालय बारा, कलैयाका प्रवक्ता तथा सूचना अधिकारी प्रहरी नायब उपरीक्षक दधिराम न्यौपानेले जानकारी गराएका छन् ।
यसैगरी पर्साको वीरगंजबाट छ किलो गाँजासहित एकजनालाई प्रहरीले पक्राउ गरेको छ । प्रहरीले वीरगंज महानगरपालिका– १६ नगवा फूलवारी टोल निवासी शेख सदामलाई पक्राउ गरेको हो ।
प्रहरीले सदामको घरमा उनी सुत्ने कोठाको खाट मुनी कालो रङ्गको प्लास्टिकको डब्बाभित्र लुकाई छिपाइ राखिएको साढे ६ किलो गाँजा र तौल गर्ने दुर्ई थान डिजिटल तराजु समेत बरामद गरेको जिल्ला प्रहरी कार्यालय, पर्सा प्रवक्ता एवम् प्रहरी नायव उपरीक्षक कुमार विक्रम थापाले जानकारी दिए ।
उनले आफनै घरमा अवैध तरिकाले लागूऔषध बिक्री वितरण गर्ने गरेको सूचनाको आधारमा जिल्ला प्रहरी कार्यालय पर्सा र लागूऔषध नियन्त्रण ब्युरो पर्साबाट खटिएको संयुक्त उनलाई मङ्गलवार दिउँसो नियन्त्रणमा लिएको थियो ।