वीरगंज, १३ फागुन । नारायणी अस्पतालमा छोरी जन्मिएको भन्दै परिवारका सदस्यहरूले झगडा गरेपछि नवजात शिशु अस्पतालमै छाडेर आमा बेपत्ता भएकी छन् ।
नारायणी अस्पतालका सूचना अधिकारी डा. उदयनारायण सिंहले अस्पतालको प्रसूती विभागमा शनिवार जन्मिएको नवजात शिशु अस्पतालको बेडमै छाडेर आमा र उनका आफन्त सम्पर्कविहीन भएका हुन् ।
आइतवार साँझसम्म पनि ती महिला वा आफन्त कोही पनि सम्पर्कमा नआएको सिंहले जानकारी दिए । शिशुलाई अस्पतालको एनआइसियु वार्डमा राखिएको उनले बताए । वीरगंज महानगरपालिका वडा नम्बर ६ रानीघाट घर भएकी ३० वर्षीया गर्भवती महिला सीता देवी साह कानुलाई लिएर उनकी सासु अस्पतालमा आएकी थिइन् । धीरज साह कानु पिता रहेको अस्पतालको रेकर्डमा उल्लेख छ । डा सिंहका अनुसार, प्रसूति गराउन अस्पतालमा आउँदा उनका पति आएका थिएनन् ।
उनले शनिवार छोरीलाई जन्म दिएकी थिइन् । यसअघि ती महिलाका तीन जना छोरी मात्रै थिए । अहिले चौथो सन्तान पनि छोरी नै जन्माएको भन्दै सासु लगायतका परिवारका सदस्यले महिलासंग कच्कच गरेपछि शनिवार बेलुकी नवजात छोरीलाई शीशुलाई अस्पतालकै बेडमा छाडेर सम्पर्कविहीन भएको जानकारी अस्पताल प्रशासनले प्रहरीलाई गराएको पर्साका प्रहरी प्रवक्ता प्रहरी नायब उपरीक्षक कुमार विक्रम थापाले बताए ।
प्रनाउ थापाले महिलाले अस्पतालको रजिष्टरमा टिपाएको नाम र ठेगाना नै गलत जस्तो देखिएको बताएका छन् रानीघाट भन्ने टोल वीरगंज महानगरपालिकाको वडा नम्बर ६ मा पर्दैन । अहिलेसम्म रानीघाट टोलमा ती नाम भएको महिला वा उनको पतिको नाम भएको व्यक्ति नै फेला नपरेको थपाले बताए । उनीहरूले योजनाबद्ध रूपमा नै शिशुलाई अस्पतालको बेडमा छाडेर हिँडेको र अस्पतालको सीसीटीभी फुटेज लगायतका आधारमा खोजी कार्य गरिरहेको प्रहरी नायब उपरीक्षक थापाले बताएका छन् ।
