वीरगंज, ३० फागुन । दाइजोमा सुनको सिक्री नपाएको निहुँमा विवाह नै भाँडेर मण्डपबाट हिँडेको आरोपमा पक्राउ परेका बेहुलासहितका पाँच जना विरूद्ध प्रहरीले विवाह सम्बन्धी कसुरमा मुद्दा दर्ता गरेर कारबाई प्रक्रिया अगाडि बढाएको छ ।
वीरगञ्ज महानगरपालिका – २४ रामगढवामा सोमवार राति बिहेको मण्डपमा वैवाहिक समारोह चलिरहेकै बेला बेहुलाले सुनको सिक्री मागेको विषयमा बेहुली पक्षसँग विवाद हुँदा कुटपिटसमेत भई बिहे नै भाँडिएको थियो । त्यसमा सङ्लन बेहुला, उनका बुबा, दुर्ई दाजु र भिनाजु गरी पाँच जनालाई प्रहरीले बेहुलीकरुै घरबाट सोमवार मध्यरातमा नियन्त्रणमा लिएको थियो ।
मङ्गलवार साँझ बेहुली पक्षले दिएको जाहेरीका आधारमा बेहुला बाराको कलैया – ४ का २८ वर्षीय उमेश साह, उनका बुबा ६० वर्षीय बच्चालाल साह गोढ, दाजुहरू ४२ वर्षीय राकेश कुमार साह, ४० वर्षीय मुकेश कुमार साह र भिनाजु बाराकै परवानीपुर – ५ का ४५ वर्षीय को रामएकवाल साहविरूद्ध विवाह सम्बन्धी कसुरमा मुद्दा दर्ता गरिएको पर्साका प्रहरी नायब उपरीक्षक (डिएसपी) कुमार विक्रम थापाले जानकारी दिए ।
उनीहरू विरूद्ध मङ्गलवार नै पर्सा जिल्ला अदालतबाट दुर्ई दिनको म्याद थप अनुमति लिई कारबाई प्रक्रिया अगाडि बढाइएको थापाले बताए ।
बिहे भाँडेको आरोपमा पक्राउ परेका बेहुला उमेश वीरगञ्ज महानगरपालिकाको स्वास्थ्य शाखामा करारमा कार्यरत कम्प्युटर अपरेटर हुन् भने बेहुली रमिता साह वीरगञ्जकै नारायणी अस्पतालको ल्याबमा कार्यरत ल्याब टेक्निसियन हुन् ।
वीरगञ्ज – २४ रामगढवास्थित बेहुलीको घरमा बनाइएको बिहेको जग्गेमा सामाजिक परम्परा अनुसार वैवाहिक विधि चलिरहेका बेला बेहुला उमेशले दाइजोमा सुनको सिक्री नपाएको भन्दै निहुँ खोजेपछि विवाद भई बेहुला र बेहुली पक्षबिच कुटाकुटसमेत भएको थियो । त्यसपछि बेहुला उमेश बिहे नगर्ने भन्दै जग्गेबाट उठेर हिँडेका थिए । लगत्तै बेहुली पक्षले खबर गरेपछि विवाह स्थलमा पुगेको प्रहरीले बेहुला उमेशसहित उनका पक्षका पाँच जनालाई नियन्त्रणमा लिएको थियो ।