वीरगंज, २२ चैत/ वीरगंज महानगरपालिकाले यसपटक पनि नयाँ वर्षलाई लक्षित गरेर रात्रिबजार लगाउने भएको छ ।
महानगरले यही चैत २९, ३० र २०८१ वैशाख १ गते तीन दिन रात्रिबजारको तयारी गरेको सो कार्यालयले जनाएको छ । यसअघि, गएको वर्षदेखि महानगरले नयाँ वर्षलाई लक्ष्Fित गरेर तीन दिने रात्रिकालीन बजार सञ्चालनमा ल्याएको थियो ।
नयाँ वर्षलाई लक्षित गरेर लगाइएको रात्रिकालीन बजार सफल भएपछि महानगरले महीनाको अन्तिम शुक्रवार र शनिवार दुई दिने रात्रिकालीन बजार लगाउने घोषणा गरेको थियो । सोअनुरूप एकाधपटक रात्रिबजार लागे पनि त्यसपछि विभिन्न कारणले लाग्न सकेन ।
यस वर्ष फेरि नयाँ वर्षलाई लक्ष्Fित गरेर रात्रिबजार लगाउने महानगरले निर्णय गरेको छ । रात्रिबजार सञ्चालन हुने अवधिमा रक्सौल–वीरगंज नाका १० बजेपछि पनि खुला गर्ने तयारी भएको छ । महानगरले यसअघि रात्रिबजार अवधिभर नाका खुला गर्ने घोषणा गरे पनि सीमानाका राति १२ बजेपछि बन्द गरिएको थियो । साधारणतया सीमानाका राति १० बजेदेखि बिहान ५ बजेसम्मको लागि बन्द हुने गर्छ ।
रात्रिबजारमा यसपटक पनि घरेलु उत्पादनका वस्तुहरूका साथै फुटपाथे चटपटे, चाट, आइसक्रिम आदिको स्टलहरू राखिनेछन् । पुरानो बसपार्क, कैलाशचोक र आदर्शनगरमा करीब सयवटा स्टल राखिने र त्यसमा घरेलु उत्पादनलाई प्राथमिकता दिइने महानगरको योजना छ ।