वीरगंज, २० फागुन । मधेस प्रदेशका मुक्त हरवा चरवाका विभिन्न स्थानीय पालिका कमिटीहरूले न्यायिक पुनस्र्थापनाको माग राख्दै मंगलवार पालिकाहरूलाई ज्ञापनपत्र बुझाएको छ ।
मुक्त हरवाचरवाको न्यायिक पुनरस्थापना हाम्रो सरोकार, शिक्षा, स्वास्थ्य, रोजगारी र सामाजिक सुरक्षा हाम्रो अधिकार नाराकासाथ मधेस प्रदेशमा शुरू भएको जागरण अभियान अन्तर्गत पर्साको पकहामैनपुर, बाराको करैयामाइ, रौतहटको बृन्दावन र सिरहाको औरही पालिकाहरूमा ज्ञापन पत्र बुझएको हो ।
पर्साको पकहामैनपुरमा केन्द्रिय सदस्य खुबलाल रामको नेतृत्वमा प्रमुख प्रशासकीय अधिकृत देवनाथ साहलाइ ज्ञापनपत्र बुझाउदै संघ र प्रदेश सरकारसंगको समन्वयमा स्थानीय सरकारद्वारा मुक्त हरवाचरवाको वास्तविक तथ्याङ्क सङ्कलन गरी उनीहरूलाई बर्गीकृत परिचय पत्र प्रदान गरिनुपर्ने, मुक्त हरवाचरवाको शिक्षा, स्वास्थ्य र रोजगारीको अधिकार सुनिश्चित गर्नु पर्ने र लैंङ्गिक भेदभाव बिना सबैलाई समान र उचित ज्याला सुनिश्चित गरिनुपर्ने माग गरेको छ ।
आगामी आर्थिक वर्षको निति, कार्यक्रम र बजेटमा हरवाचरवाको पक्षमा निति, कार्यक्रम र बजेट बिनियोजन गरिनुपर्ने र हरवाचरवाको पहिचान, परिचयपत्र र पुनःस्थापनाका लागि स्थानीय तहबाट कार्यबिधि निर्माण गरिनुपर्ने लगायतका मागहरू गरिएको कमिटीका जिल्ला अध्यक्ष अमरदेव पासवानले बताउनु भयो ।
त्यस्तै बाराको करैयामाइमा झगरू पासवान, रौतहटको बृन्दावनमा दशरथ राम र सिरहाको औरहीमा श्यामसुन्दर सदाको अगुवाइमा ज्ञापनपत्र बुझाइएको रौतहट जिल्ला सहजकर्ता सुबासहेब पासवानले बताउनु भयो ।