वीरगंज, २ वैशाख । सामाजिक संजाल मार्फत उत्तेजाना । अराजकता फैलाउने किसिमका पोष्ट गर्नेहरुलाई स्थानीय प्रशासनले कारावाहीको चेतावनी दिएको छ ।
पर्साका प्रमुख जिल्ला अधिकारी गणेश अर्यालले एक सूचना जारी गर्दै सामाजिक सञ्जालहरू मार्फत समाजमा द्वेष र उत्तेजना सिर्जना गर्ने गरी सार्वजनिक भएका भ्रामक सूचनाहरूप्रति गम्भीर ध्यानाकर्षण भएको उल्लेख गरेका छन।
अर्यालले अफवाहहरूलाई विश्वास नगर्न सबैलाई आग्रह गरेका छन । सूचनामा खासगरी पुराना घटनाहरूलाई बंग्याएर वा गलत तरिकाले प्रस्तुत गरी वीरगंजको परिवेशलाई प्रतिकूल असर गर्ने र वीरगंजमा नै शान्ति खल्बल्याउने उद्देश्यले असत्य सामग्रीहरू सार्वजनिक भएको पाइएको उनले उल्लेख गरेका छ ।
यस्ता कार्य गर्ने, शेयर गर्ने, लाइक गर्ने र सामाजिक सद्भाव बिथोल्ने गरी कुनै कार्य गर्ने र गराउने उपर कानून बमोजिम कडा कारबाही गरिने उनले चेतावनी दिएका छन । साथै, त्यस्ता सामग्रीहरूलाई निरुत्साहित गर्न सम्पूर्णमा अनुरोध गरिएको छ।
