अभिलाष गुप्ता
वीरगंज, ३० असोज । चित्रांश यूथ टिम वीरगंजको आयोजनामा तथा चित्रगुप्त समिति वीरगंजको प्रस्तुतिमा “पहिलो कायस्थ सुपर सिक्स नॉकआउट प्रतियोगिता–२०८२” आयोजना हुने भएको छ।
आज वीरगंजमा पत्रकार सम्मेलन गर्दै कार्यक्रमका संयोजक प्रकाश कर्ण, मिहिर कर्ण, महेश दास र राजन श्रीवास्तवले प्रतियोगिता सम्बन्धी विस्तृत जानकारी दिएका छन्।संयोजकहरुले जनाएका अनुसार उक्त प्रतियोगिता कार्तिक ७ गते बिहान ७ बजेबाट वीरगंजको ज्ञानदा एकेडेमीको मैदानमा सुरु हुनेछ।
कार्यक्रममा वीरगंज महानगरपालिकाको सहयोग रहनेछ। यो प्रतियोगिता सुपर सिक्स नॉकआउट प्रारूपमा खेलाइनेछ, जसअन्तर्गत कुल १० टिमहरू सहभागी हुनेछन्। प्रत्येक खेल ५ ओभरको हुनेछ र सम्पूर्ण प्रतियोगिता एकै दिनमा सम्पन्न गरिने योजना रहेको संयोजकहरूले बताएका छन्।
पत्रकार सम्मेलनपछि सहभागी टिमहरूका खेलाडीहरूको अक्सन (किनबेच प्रक्रिया) समेत सम्पन्न गरिने जानकारी पनि दिइएको छ।
यस प्रतियोगिताको उद्देश्य युवाबीच आपसी सहयोग, खेलप्रतिको रुचि र सामाजिक एकता अभिवृद्धि गर्नु रहेको आयोजक समितिले जनाएको छ।
