अभिलाष गुप्ता
वीरगंज ३१ असोज । सामुदायिक सेवा केन्द्र तथा सामुदायिक प्रहरी सेवा कुम्हालटोलले वडा प्रहरी कार्यालय बिर्ताका प्रमुख प्रहरी निरीक्षक निरोज चौलागाईंलाई एक विशेष समारोहका बीच बिदाई गरेको छ।
सामुदायिक प्रहरी सेवा कुम्हालटोलका अध्यक्ष रमेश चौधरीको अध्यक्षता तथा सचिव श्रवन बहादुर रायमाझीको सञ्चालनमा सम्पन्न उक्त कार्यक्रममा समाजसेवी, सामाजिक अगुवा, सञ्चारकर्मी, सामुदायिक प्रहरी सेवा केन्द्रका पदाधिकारी र आजीवन सदस्यहरूको उल्लेखनीय उपस्थिति रहेको थियो।
कार्यक्रममा कंचनजंधा स्कुलका निर्देशक माटिन मोक्तानले स्वागत मन्तव्य ब्यक्त गरेका थिए।उक्त कार्यक्रममा मुनलाईट स्कुलका संचालक श्याम केसिले पनि आफ्नो स्कुलको तर्फ बाट मायाको चिनो दिएका थिए।
कार्यक्रममा बोल्ने वक्ताहरूले प्रहरी निरीक्षक चौलागाईंले आफ्नो कार्यकालमा समुदायसँग नजिकिएर काम गरेको, स्थानीय समस्या समाधानमा सक्रिय भूमिका निर्वाह गरेको र प्रहरी–नागरिक सहकार्यलाई सुदृढ बनाउन योगदान पुर्याएको भन्दै प्रशंसा गरेका थिए।
समारोहमा चौलागाईंलाई खादा, टीका र मायाको चिनो प्रदान गर्दै सम्मानपूर्वक बिदाई गरिएको थियो।उहाँको काठमाडौं अपराध महाशाखामा सरुवा भएको अवसरमा सहभागीहरूले उहाँको भावी कार्यकाल सफल र प्रगतिशील रहोस् भन्ने शुभकामना व्यक्त गरे।
अध्यक्ष चौधरीले भने, “निरोज सरले सामुदायिक प्रहरी अवधारणालाई व्यवहारमा उतार्न महत्वपूर्ण योगदान दिनुभयो। उहाँको नेतृत्वमा समुदाय र प्रहरीबीचको सम्बन्ध अझ सुदृढ बन्यो।”
कार्यक्रमको अन्त्यमा बिदाइ हुने प्रहरी निरीक्षक चौलागाईंले समुदायबाट प्राप्त स्नेह र साथप्रति आभार प्रकट गर्दै आगामी दिनहरूमा पनि प्रहरी सेवामार्फत समाज र देशको हितका लागि निरन्तर योगदान दिने प्रतिबद्धता व्यक्त गरे।
