वीरगंज, १४ मंसिर । किरण वेभरेज नेपाल प्रालिका मैनेजरको हत्याको आरोपमा सोही उद्योगका चालकसहित दुईजना पक्राउ परेका छन् ।
आइतवार जिल्ला प्रहरी कार्यालय, बाराले पत्रकार सम्मेलनको आयोजना गरी व्यक्तिगत रिसइबीको कारण चालक राजन कुमार रामले साथीसंग मिलेर मैनेजर रामकिशोर सिंहको चक्कु र इटाले प्रहार गरी विभत्स हत्या गरेको जिप्रका, बाराले जनाएको छ ।
मंसिर ११ गते राति ८ः२५ बजेको समयमा जिल्ला बारा, प्रसौनी गाउँपालिका वडा नं.६ भलुही चोक स्थित किरण वेभरेज नेपाल प्रालि (पानी फ्याक्ट्री) भन्दा २५ मिटर उत्तर तर्फ रहेको अगाडी खाल्डोमा सो उद्योगका मैनेजर जिल्ला सर्लाही धनकौल गा.पा. वडा नं.२ घर निवासी नरसिंह सिंहको छोरा वर्ष ५० को राम किशोर सिंहको हत्या भएको प्रहरीले जनाएको छ ।
जिल्ला पर्सा वीरगंज महानगरपालिका वडा नं. २२ मनियारी बस्ने करिमन रामको छोरा वर्ष २१ को राजन कुमार राम सो पानी फ्याक्ट्रीमा चालकको रूपमा काम गर्दै आइरहेका थिए । रामले गत वर्षको गढीमाईको मेलाको बखत गाडीको कलच प्लेट जलाएको कारण मैनेजर सिंह र रामबीच झगडा भएको थियो । त्यसपछि रामले काम छाडेको र पुनः ०८२।०७।०१ गते देखि २०८२।०८।१० गते सम्म सो उद्योगमा काम गर्ने क्रममा फ्याक्ट्रीले तोकेको पानीको बिक्री मुल्य रू. ११० लाई निज चालक राजन कुमार रामले आफ्नो व्यक्तिगत मुनाफाको लागि पानी रू.११५ देखि १२० बजारमा बेच्दै आएको कुरा मैनेजर सिंहले थाहा पाए पछी मिति २०८२।०८।१० गते पुनः मैनेजर सिंहले रामलाई कामबाट हटाएको थियो ।
मिति २०८२।०८।११ गते सिंहले रामको हिसाब किताब गरी रकम समेत फर्छाैट गरी दिएका थिए । सोही रिसईवीलाई लिई राजन कुमार राम र निजको साथी प्रमोद साह तुरहाले वीरगंजमा संगै बसी जाँड रक्सी खाई हत्या गर्ने योजना बनाएका थिए ।
सोही दिन राति ८ः२५ बजेको समयमा राम किशोर सिंह फ्याक्ट्रीमा रहेको अवस्थामा दुबै जना आई साथमा बोकी ल्याएका धारिलो हतियार छुरा र ईटले हिर्काएर विभत्स हत्या गरेको तथा सो स्थानबाट रगतले लतपतिएको चक्कु र इटा भेटिएको प्रारम्भिक अनुसन्धानको क्रममा खुल्न आएको जिप्रका, बाराले जनाएको छ ।
मंसिर १२ गते बिहान ७ः५७ बजेको समयमा सूचनाको आधारमा जिल्ला प्रहरी कार्यालय बाराले फरार रहेका दुवैजनालाई खोजतलाशको क्रममा जिल्ला प्रहरी कार्यालय पर्साको समन्वयमा पर्सा जिल्लाको छिपहरमाई गा.पा.वडा नं. ५ भिस्वाको नाकाबाट भारततर्फ भाग्दै गरेको अवस्थामा राजन कुमार रामलाई र प्रमोद साह तुरहालाई वीरगंज म.न.पा.वडा न.–२२ बाट पक्राउ गरेको जिप्रका, बाराले जनाएको छ ।
घटना भएको १६ घण्टाभित्र बारा प्रहरीले दुवै व्यक्तिहरूलाई पक्राउ गरी कर्तव्य ज्यान कसुर मुद्दामा बारा जिल्ला अदालतबाट सात दिनको म्याद लिई थप अनुसन्धान कार्य भईरहको जनाएको छ ।
प्रतिक्रिया लेख्नुहोस् ।
