अभिलाष गुप्ता
वीरगंज, १२ पुष । इरानको उरमिया सहरमा सम्पन्न ७ औँ एसियाली कुस्ती च्याम्पियनसिप २०२५ मा सहभागिता जनाई वीरगंज फर्किएका कुस्ती खेलाडीहरूलाई वीरगंज महानगरपालिकाले सम्मान गरेको छ ।
महानगरपालिकाका मेयर राजेशमान सिंहले आज आफ्नै कार्यकक्षमा आयोजित कार्यक्रममा प्रतियोगितामा सहभागी ४ जना खेलाडी—कुन्दन साह, सुजित यादव, निखिल पटेल र राम किशोर यादवलाई गम्छा तथा मायाको चिनो प्रदान गर्दै सम्मान गरे । साथै, च्याम्पियन सिपमा सहभागी अन्य ११ जना कुस्ती खेलाडीहरूलाई ट्र्याक सुट प्रदान गरी सम्मान गरिएको थियो ।
कार्यक्रममा मेयर सिंहले अन्तर्राष्ट्रिय प्रतियोगितामा सहभागिता जनाई देश तथा वीरगंजको नाम चिनाउन सफल खेलाडीहरूको प्रशंसा गर्दै खेलकुद विकासका लागि महानगरपालिका सधैं साथमा रहने प्रतिबद्धता व्यक्त गरे । उनले खेलाडीहरूलाई आगामी दिनमा अझ उत्कृष्ट प्रदर्शनका लागि निरन्तर अभ्यास र अनुशासनमा ध्यान दिन आग्रहसमेत गरे ।
सम्मानित खेलाडीहरूले महानगरपालिकाबाट प्राप्त सम्मानले आफूहरूलाई थप हौसला र प्रेरणा मिलेको प्रतिक्रिया व्यक्त गरेका छन् ।
