रक्सौल, २५ माघ । रक्सौल शहरको नागा रोडस्थित बाबा मठिया परिसरमा आइतबार राष्ट्रीय स्वयंसेवक संघको शताब्दी वर्षको अवसरमा समग्र हिन्दू उत्थान समिति, स्वामी विवेकानन्द बस्ती रक्सौल नगरको आयोजनामा हिन्दू सम्मेलन सह हनुमान आराधना भव्य रूपमा सम्पन्न भएको छ।
ठूलो संख्यामा श्रद्धालुहरूको सहभागिताले सम्पूर्ण बाबा मठिया परिसर भक्तिमय वातावरणले ओतप्रोत बनेको थियो।
कार्यक्रमको पहिलो सत्र आचार्य उमेश तिवारीको संयोजनमा विधिवत रूपमा श्री हनुमानजीको पूजन तथा पंचोपचारसहित सुरु भएको थियो। त्यसपछि भजन मण्डलीद्वारा गणेश वन्दना, सस्वर सुन्दरकाण्ड पाठ तथा एकपछि अर्को भावपूर्ण भजनहरूको प्रस्तुति दिइयो, जसले श्रद्धालुहरूलाई भक्ति रसमा डुबाएको थियो। लामो समयसम्म सम्पूर्ण परिसर भक्ति गीतले गुञ्जायमान रह्यो।
दोस्रो सत्रमा भारत माताको तैलचित्रमा पुष्पाञ्जली अर्पण गर्दै आरती गरिएको थियो। यस अवसरमा समितिका अध्यक्ष राकेश रंजन वर्माले संघको शताब्दी वर्षको उपलक्ष्यमा विभिन्न बस्तीहरूमा आयोजना भइरहेका हिन्दू सम्मेलनहरूको उद्देश्य र रूपरेखाबारे प्रकाश पारे।
कार्यक्रमलाई सम्बोधन गर्दै राष्ट्रीय स्वयंसेवक संघका उत्तर बिहार सह–प्रान्त सञ्चालक मान्यवर श्री राजकिशोर सिंहले हिन्दू समाजको एकता, सांस्कृतिक चेतना र सामाजिक समरसता आजको समयको प्रमुख आवश्यकता भएको बताए। उनले संघको शताब्दी वर्षको अवसरमा देशभर आयोजना भइरहेका यस्ता सम्मेलनहरूले समाजलाई संगठित गर्ने दिशामा महत्वपूर्ण भूमिका खेलेको उल्लेख गरे। बदलिँदो राष्ट्रिय तथा अन्तर्राष्ट्रिय परिस्थितिको सन्दर्भमा हिन्दू सम्मेलनहरूको बढ्दो प्रासंगिकतामाथि पनि उनले विचार व्यक्त गरे।
त्यसैगरी काली न्यासका पीठाधीश्वर श्री श्री १०८ सेवक संजयनाथले साधु–सन्तहरूको भूमिकामाथि प्रकाश पार्दै हिन्दू समाजको समग्र उत्थानका लागि सबैलाई एकजुट हुन आह्वान गरे।
कार्यक्रमका मुख्य वक्ता विश्व हिन्दू परिषदका क्षेत्रीय संगठन मन्त्री मान्यवर श्री आनन्द कुमारले आफ्नो उद्बोधनमा हिन्दूको परिभाषा स्पष्ट गर्दै भने, “हिन्दू कुनै पन्थ वा सम्प्रदाय मात्र होइन, यो एक जीवन दर्शन हो। सत्य, अहिंसा, करुणा, सेवा, सहिष्णुता र राष्ट्रभावलाई आचरणमा उतार्ने व्यक्ति नै सच्चा हिन्दू हो।”
उनले संघको शताब्दी वर्षमा आयोजना गरिएका यस्ता कार्यक्रमहरूको मुख्य उद्देश्य हिन्दू समाजलाई संगठित गर्नु, सांस्कृतिक मूल्यहरूको संरक्षण, सामाजिक समरसता प्रवर्द्धन तथा ‘राष्ट्र प्रथम’को भावनासहित आत्मनिर्भर भारत निर्माणमा जनसहभागिता सुनिश्चित गर्नु भएको बताए। साथै उनले छुवाछूत र जातीय विभेदजस्ता सामाजिक कुरीतिहरू अन्त्य गर्न र पञ्च परिवर्तन—सामाजिक सद्भाव, कुटुम्ब प्रबोधन, वातावरण संरक्षण, स्वदेशी र नागरिक कर्तव्य—माथि विशेष जोड दिए।कार्यक्रमको अध्यक्षता राकेश रंजन वर्माले गरेका थिए भने मंच सञ्चालन अमरेंद्र पाण्डेयले गरेका थिए। अन्त्यमा प्रसाद वितरण, समितिका सचिवको धन्यवाद ज्ञापनसँगै कार्यक्रमको समापन गरिएको थियो।
यस अवसरमा विश्व हिन्दू परिषदका पूर्णकालिक कार्यकर्ता श्री भानुप्रताप जी, उत्तर बिहार सह–प्रान्त सञ्चालक डा. (प्रो.) राजकिशोर सिंह, अवधेश सिंह, भारत विकास परिषदका रजनीश प्रियदर्शी, मनीष दूबे, भाजपा नेत्री तथा काली सेना राष्ट्रिय प्रमुख पार्वती तिवारी, प्रो. चन्द्रमा सिंह, प्रो. जगदीश प्रसाद, गुड्डू सिंह, ईशान्त पाण्डेय, राजु गुप्ता, चैतन्य कुमार, दुर्गेश कुमार, चन्दन कुमार, मनोज कुमार, विकास कुमार, हेमन्त वर्णवाल लगायत ठूलो संख्यामा स्वयंसेवक तथा श्रद्धालुहरूको उपस्थिति रहेको थियो।
