काठमाडौं, १६ साउन । नेपालमा जारी द्वन्द्व, अशान्ति तथा तनावको अन्त्य गर्दै विश्व शान्तिको कामनासहित सप्तरङ्गी इन्द्रेणी समाजको आयोजनामा शुक्रबार काठमाडौंमा शान्ति प्रार्थना तथा दीप प्रज्वलन कार्यक्रम सम्पन्न भएको छ।
आयोजक संस्थाद्वारा जारी विज्ञप्तिअनुसार कार्यक्रममा परम्परागत बटर ल्याम्प (दीप) प्रज्वलन, विश्व शान्तिको प्रार्थना तथा बौद्ध परम्पराअनुसार प्राणिदान गरिएको थियो। कार्यक्रममार्फत करुणा, अहिंसा, सहिष्णुता र सामाजिक सद्भावको सन्देश प्रवाह गरिएको जनाइएको छ।
संस्थाले नेपालमा हिंसा, द्वन्द्व र आपसी वैमनस्यको अन्त्य भई सबै प्राणीबीच मित्रता, करुणा, प्रेम र शान्तिको भावना विकास होस् भन्ने पवित्र उद्देश्यका साथ कार्यक्रम आयोजना गरिएको जनाएको छ। विज्ञप्तिमा दीगो शान्तिका लागि पारस्परिक सम्मान, सहिष्णुता र सामाजिक एकता अपरिहार्य रहेको उल्लेख गरिएको छ।
कार्यक्रमको समापनमा समाजका अध्यक्ष माणिक लामा गोलेले बौद्ध परम्पराअनुसार पारिणाम पूजा सम्पन्न गरिएको तथा शान्ति र समृद्धिको कामनासहित बौद्ध स्तूपाको परिक्रमा गरिएको जानकारी दिए।
हाल देशका विभिन्न स्थानमा देखिएका तनावपूर्ण घटनाक्रमका बीच नेपालका विभिन्न संघ–संस्था तथा समुदायका अगुवाहरूले संयमता अपनाउन, संवादमार्फत समस्या समाधान गर्न र सामाजिक तथा धार्मिक सद्भाव कायम राख्न आग्रह गरिरहेका छन्। सरकारले पनि नागरिकहरूलाई अफवाह र भ्रामक सूचनाबाट सचेत रहँदै राष्ट्रिय एकता तथा सामाजिक सद्भाव कायम राख्न अपिल गर्दै आएको छ।
