अभिलाष गुप्ता
वीरगंज, १६ साउन । नेपाली युवा उद्यमी मञ्च (एनवाईईएफ) वीरगञ्ज च्याप्टर र द स्टार्टअप नेटवर्क (टीएसएन) बीच नेपालमा उद्यमशीलता, नवप्रवर्तन (इनोभेसन), स्टार्टअप विकास तथा क्षमता अभिवृद्धिलाई प्रवर्द्धन गर्ने उद्देश्यसहित समझदारीपत्र (एमओयू) मा हस्ताक्षर गरिएको छ।
वीरगञ्जमा शनिबार आयोजित एक कार्यक्रमबीच एनवाईईएफ वीरगञ्ज च्याप्टरका स्टार्टअप चेयर अतुल राउत को नेतृत्वमा दुवै संस्थाबीच औपचारिक रूपमा एमओयूमा हस्ताक्षर सम्पन्न भएको हो।
समारोहमा वीरगञ्ज उद्योग वाणिज्य संघ (बीआईसीसीआई) का अध्यक्ष हरि गौतम, नेपाल उद्योग वाणिज्य महासंघ (एफएनसीसीआई) मधेश प्रदेशका आईपीपी अशोक टेमानी, बीआईसीसीआईका उपाध्यक्ष माधव राजपाल, नेपाल–भारत चेम्बर अफ कमर्स एण्ड इन्डस्ट्री (एनआईसीसीआई) का अध्यक्ष अभिषेक चौधरी, द स्टार्टअप नेटवर्कका अध्यक्ष सुदीप रौनियार तथा दुवै संस्थाका पदाधिकारी र सदस्यहरूको उल्लेखनीय उपस्थिति रहेको थियो।
समझदारीअनुसार दुवै संस्थाले संयुक्त रूपमा उद्यमशीलता विकाससम्बन्धी कार्यक्रम, स्टार्टअपलाई लक्षित मार्गदर्शन (मेण्टरसिप), क्षमता अभिवृद्धि तालिम, नेटवर्किङ कार्यक्रम तथा नवप्रवर्तनमा आधारित विभिन्न गतिविधि सञ्चालन गर्नेछन्। यस सहकार्यबाट नयाँ सोच भएका युवालाई व्यवसाय सुरु गर्न आवश्यक ज्ञान, सीप, सञ्जाल र अवसर उपलब्ध गराउँदै नेपालको स्टार्टअप इकोसिस्टमलाई थप सुदृढ बनाउने लक्ष्य लिइएको छ।
कार्यक्रममा बोल्ने वक्ताहरूले नेपालमा उद्यमशीलताको सम्भावना दिनप्रतिदिन विस्तार हुँदै गएको उल्लेख गर्दै निजी क्षेत्र, उद्यमी संस्था तथा स्टार्टअप समुदायबीचको सहकार्यले नवप्रवर्तनमा आधारित व्यवसायलाई प्रोत्साहन पुग्ने विश्वास व्यक्त गरे।
दुवै संस्थाका प्रतिनिधिहरूले यस समझदारीले विशेषगरी मधेश प्रदेशसहित देशभरका युवा उद्यमी र स्टार्टअपहरूलाई नयाँ अवसर सिर्जना गर्न, लगानी, सहकार्य तथा व्यवसाय विस्तारका सम्भावनाहरू बढाउन महत्वपूर्ण भूमिका खेल्ने विश्वास व्यक्त गरेका छन्।
