अभिलाष गुप्ता
वीरगंज, २८ कार्तिक । ज्ञान शीत एकता प्राज्ञिक विद्यार्थी परिषद् नेपालद्वारा आयोजित राष्ट्रिय छात्रा सम्मेलन–२०८२ वीरगञ्ज, पर्सामा अत्यन्त भव्यताका साथ सम्पन्न गरिएको छ। महिला सुरक्षा, स्वास्थ्य, सम्मान र नेतृत्व विकासलाई मूल विषय बनाइएको यस सम्मेलनमा देशभरका छात्राहरूको उल्लेखनीय सहभागिता रहेको आयोजक समितिले जनाएको छ।
उद्घाटन समारोहका प्रमुख अतिथि माननीय न्यायाधिवक्ता श्री सविता भण्डारी रहनु भएको थियो भने विशिष्ट अतिथिका रूपमा अखिल भारतीय विद्यार्थी परिषद्का अखिल भारतीय राष्ट्रिय छात्रा प्रमुख प्राध्यापक मनु कटारिया, प्राज्ञिक विद्यार्थी परिषद् नेपालकी राष्ट्रिय उपाध्यक्ष लक्ष्मी कर्ण, राष्ट्रिय सचिव मुना बिष्ट, राष्ट्रिय छात्रा प्रमुख डा. सुष्मा तिवारी, स्वागत समिति अध्यक्ष निभा दास, सचिव मिनाक्षी गुप्ता, विद्यार्थी परिषद् प्रदेश अध्यक्ष पल्लवी हरलालका, उद्योग–व्यवसाय समुदायबाट उद्योग वाणिज्य संघ वीरगंजका उपाध्यक्ष माधव राजपाललगायत कईँ अतिथि तथा पदाधिकारीहरूको विशेष उपस्थिति रहेको थियो।
उद्घाटन भाषणका क्रममा प्रमुख अतिथि भण्डारीले छात्रा तथा युवा वर्गले राष्ट्रप्रतिको जिम्मेवारी, कर्तव्य र समर्पणलाई जीवनको मूल सिद्धान्तको रूपमा आत्मसात् गर्नुपर्नेमा जोड दिँदै, महिला नेतृत्व विकासका लागि परिषद् सक्रिय रूपमा कार्यरत रहेको उल्लेख गरिन्।
कार्यक्रमका विभिन्न सत्रहरूमा महिला अधिकार, शैक्षिक नेतृत्व, चरित्र निर्माण, सामाजिक उत्तरदायित्व, धार्मिक–सांस्कृतिक चेतना तथा युवाहरूको भूमिकाबारे विशिष्ट वक्ताहरूले महत्वपूर्ण विचार प्रस्तुत गरे। सम्मेलन स्थल राष्ट्रिय झण्डा, सांस्कृतिक प्रतीक र फूलमालाले सजाइएको थियो। मञ्चमा उपस्थित अतिथि, पदाधिकारी तथा विशिष्ट व्यक्तित्वहरूलाई सम्मान चिह्न प्रदान गरिएको थियो।
कार्यक्रम स्थलको अगाडि राखिएको प्रभावशाली नाराले “कर्तव्य जानौँ, कर्ममा रमाऔँ, आफ्नै देशमा बगाऔँ, नेपाली जागौँ नेपाल जगाऔँ” सम्मेलनको मूल उद्देश्य झल्किरहेको थियो।
प्राज्ञिक विद्यार्थी परिषद् नेपालका पदाधिकारीहरूले भविष्यमा महिला सशक्तिकरण, विद्यार्थी नेतृत्व विकास, राष्ट्रियता तथा सामाजिक चेतनासम्बन्धी अभियानहरूलाई अझ मजबुत रूपमा अघि बढाउने प्रतिबद्धता जनाए। दुईदिने राष्ट्रिय छात्रा सम्मेलन धन्यवाद ज्ञापन तथा समापन सत्रसँगै सफलतापूर्वक सम्पन्न भएको आयोजकले जनाएको छ।
