वीरगंज, ०८ मंसिर । स्रोत नखुलेको १५ लाख हुण्डीको रकम सहित एक जना पक्राउ परेका छन् ।
पर्सा जिल्लाको पकाहामैनपुर वडा नं.१ बस्ने वर्ष ३४ को अवधेश पटेललाई आइतवार चेकजाँचमा खटिएको नेपाल प्रहरी र सशस्त्र प्रहरीको संयुक्त टोलीले पक्राउ गरेको जनाएको छ ।
भारतबाट आँउदै गरेका पटेलले हाँकेको बीआर २२ ए एफ ४१२६ नम्बरको मोटरसाइकल रोकेर चेकजाँच गर्दा झोलाबाट नगद १५ लाख रुपियाँँ फेला परेको पर्साका प्रहरी नायब उपरीक्षक हरिबहादुर बस्नेतले जानकारी गराएका छन् ।
पटेलको साथबाट प्रहरीले हजारको नोट ७९० थान, ५०० दरका नोट १३०१ थान, सयको ५६९ थान रु ५० को ५० नोट गरी जम्मा १५ लाख रकम सहित पक्राउ गरेको बस्नेतले बताए । रकम र मोटरसाइकलसहित नियन्त्रणमा लिइएका पटेललाई प्रहरी हिरासतमा राखेर उनिविरूद्ध मुलुकी अपराध संहिता २०७४ को दफा १२५ को क बमोजिम कसुरमा अनुसन्धान भइरहेको प्रहरीले जानकारी गराएको छ ।
प्रतिक्रिया लेख्नुहोस् ।
