अभिलाष गुप्ता
वीरगंज, ०९ मंसिर । विश्व हिन्दू परिषद् नेपाल, वीरगंज महानगर समिति द्वारा श्री सीताराम विवाह महोत्सव तथा भारतको अयोध्यास्थित भव्य श्रीराम मन्दिरको शिखरमा धर्मध्वज स्थापना भएको पवित्र अवसरमा मंगलबार एक विशेष धार्मिक कार्यक्रम सम्पन्न गरिएको छ।
उक्त अवसरमा परिषद्का पदाधिकारी तथा स्वयंसेवकहरू विभिन्न टोल–बस्तीमा पुग्दै वीरगञ्ज महानगरका करिब ५०० भन्दा बढी सनातनी परिवारहरूका घरमा भगवा ध्वज र शुभकामना पत्र वितरण गरेका छन्। परिषद्का अनुसार यो अभियानको उद्देश्य सनातन धर्मप्रति जनमानसमा आस्था, एकता र धार्मिक चेतना जगाउनु रहेको छ।
अभियानमा सहभागी स्थानीय युवा, महिला समूह तथा धार्मिक व्यक्तित्वहरूले घर–घरमा पुगेर धर्मध्वज वितरण मात्र नभई श्रीरामको आदर्श, मर्यादा र धर्मध्वजको सांस्कृतिक महत्वबारे संक्षिप्त जानकारी पनि दिएका थिए।
कार्यक्रमका संयोजकहरूले भने— “अयोध्यास्थित श्रीराम मन्दिरमा धर्मध्वज स्थापना सम्पूर्ण सनातनीहरूका लागि गौरव र उत्साहको विषय हो। यसैको उल्लासमा वीरगञ्जका घर–घरमा भगवा ध्वज फहराउँदै धार्मिक एकता र सांस्कृतिक गौरवलाई सशक्त बनाउँदैछौं।”
स्थानीय बासिन्दाहरूले पनि विश्व हिन्दू परिषद्को यस पहलको स्वागत गर्दै आफ्नो घरमा भेटिएको भगवा ध्वजलाई श्रद्धापूर्वक आरोहण गर्ने प्रतिवद्धता जनाएका छन्।
कार्यक्रमलाई सफल बनाउने उद्देश्यले परिषद्का कार्यकर्ताहरूले विभिन्न वडाहरूमा टोली बनाएर वितरण कार्य निरन्तरता दिएका थिए। अभियान आगामी दिनहरूमा अन्य क्षेत्रहरूमा पनि विस्तार गरिने जानकारी परिषद्ले दिएको छ।
