वीरगंज, २० मंसिर । वीरगंज महानगरपालिकाका उप–प्रमुख इम्तियाज आलमले वडा नं. १५ भेडीयाहीस्थित सार्वजनिक जग्गाको आज स्थलगत निरीक्षण गरेका छन् । स्थानीय युवाहरूको माग अनुसार उक्त स्थललाई क्रिकेट खेल्न उपयुक्त मैदानका रूपमा विकास गर्ने उद्देश्यले निरीक्षण गरिएको हो ।
निरीक्षणका क्रममा उप–प्रमुख आलमले युवालाई खेलकुदतर्फ आकर्षित गर्न तथा प्रतिभा निखार्न आवश्यक पूर्वाधार निर्माण महानगरको प्राथमिकता मा रहेको बताए । उनले खेल मैदान निर्माणका लागि महानगरपालिकाले आवश्यक सहयोग र समन्वय गर्न तयार रहेको समेत स्पष्ट पारे ।
निरीक्षण कार्यक्रममा नेपाली कांग्रेस क्षेत्र नं. १ का कार्यवाहक क्षेत्रीय सभापति अनिल प्रसाद सिंह, पूर्व वडा अध्यक्ष गजेन्द्र पटेललगायत वडा प्रतिनिधि, स्थानीय समाजसेवी तथा युवाहरूको सक्रिय उपस्थिति रहेको थियो । स्थानीय युवाहरूले खेल मैदान नहुँदा वर्षौंदेखि समस्या भोग्दै आएको बताउँदै शीघ्र निर्माण कार्य अघि बढाइदिन आग्रह गरेका थिए ।
उप–प्रमुख आलमले युवाहरूको माग उचित रहेको बताउँदै जल्दै आवश्यक प्रक्रिया पूरा गरी उक्त सार्वजनिक जग्गालाई व्यवस्थित क्रिकेट मैदानका रूपमा विकास गर्ने प्रतिबद्धता व्यक्त गरेका छन् ।
