अभिलाष गुप्ता
वीरगंज, २१ मंसिर । सामुदायिक रेडियो नारायणी एफएमले आफ्नो २०औं वार्षिकोत्सवको अवसरमा आयोजना गरेको समाचार वाचन प्रतियोगिता भव्य रूपमा सम्पन्न भएको छ । प्रतियोगितामा सहभागी प्रतिस्पर्धीहरूलाई पछाडि पार्दै माधव तिमिल्सिनाले पहिलो स्थान हासिल गरेका छन् ।
प्रतियोगितामा माधव तिमिल्सिना प्रथम, लक्ष्मी खरेल द्वितीय र सुर्यनारायण विक तृतीय घोषित भएको नारायणी एफएमले जनाएको छ। तिमिल्सिनाले नगद २० हजार, खरेलले १५ हजार तथा विकले १० हजार रुपैयाँ नगद पुरस्कार प्राप्त गरे ।
यस्तै, उत्कृष्ट प्रदर्शनका आधारमा सुरेश बिडारी, बिमला गुप्ता र आर्जु देवकोटालाई जनही ५/५ हजार रुपैयाँको सान्त्वना पुरस्कार प्रदान गरिएको छ । २०औं वार्षिकोत्सव समारोह वीरगन्ज महानगरपालिका प्रमुख राजेशमान सिंहको प्रमुख आतिथ्यमा सम्पन्न भएको थियो । कार्यक्रममा नेपाल पत्रकार महासंघ मधेस प्रदेशका लेखा समिति संयोजक केसी लामिछाने, महासंघका मधेस प्रदेश अध्यक्ष श्याम बन्जारा, पर्साका प्रमुख जिल्ला अधिकारी भोला दाहाल, पर्सा प्रहरी प्रमुख सुदिपराज पाठक, सखुवाप्रसौनी गाउँपालिका अध्यक्ष जसवन्त यादवलगायतको उपस्थिति रहेको थियो । कार्यक्रमको अध्यक्षता एफएमका कार्यकारिणी अध्यक्ष गोविन्द देवकोटाले गरेका थिए ।
