अभिलाष गुप्ता
वीरगंज, ०३ पौष । निजी तथा आवासीय विद्यालय सङ्गठन (प्याब्सन) वीरगंजको आयोजना मा दोस्रो संस्करणको ‘प्याब्सन गर्लस एन्ड जुनियर बोएज टी–१० नकआउट क्रिकेट टुर्नामेन्ट ’ अन्तर्गत आज बिहीबार चार खेल सम्पन्न भएका छन् ।
८ ओभरमा खेलाइएको पहिलो खेलमा लिटल फ्लावर स्कूलले गोल्डेन फ्युचर स्कूललाई पराजित गर्दै जित हात पारेको छ । २३ रनको लक्ष्य पछ्याएको लिटल फ्लावरले २५ रन बनाउँदै विजय हासिल गर्यो । दोस्रो खेलमा विकन स्कूलले दिएको ४९ रनको लक्ष्य सेन्ट जेभियर विद्यालयले ५० रन बनाएर पूरा गर्दै जित निकालेको छ ।
त्यसैगरी तेस्रो खेलमा नवदीप स्कूलले दिएको ३८ रनको लक्ष्य ज्ञान वाटिकाले सफलतापूर्वक पछ्याउँदै जीत हात पार्यो । अन्तिम खेलमा कालिकामाई स्कूलले चिल्ड्रेन वर्ल्डलाई पराजित गर्दै प्रतियोगितामा आफ्नो स्थान सुरक्षित गरेको छ ।
विद्यालय स्तरका छात्रा तथा जुनियर छात्रलाई लक्षित गर्दै आयोजना गरिएको यो प्रतियोगिता वीरगंज स्थित आदर्शनगर रङ्गशालामा सञ्चालन भइरहेको छ । खेलकुदले विद्यार्थीहरूको प्रतिभा उजागर गर्न सहयोग पुग्ने भन्दै स्थानीयवासी तथा दर्शकहरूले यस्ता प्रतियोगिता भविष्यमा पनि निरन्तर हुनुपर्ने चाहना व्यक्त गरेका छन् ।
