अभिलाष गुप्ता
वीरगंज, २७ पुष । जगरनाथपुर गाउँपालिका वडा नम्बर ४ मा समाजसेवी तथा गाउँपालिकाका मेयर प्रत्याशी बृजेश्वर प्रसाद चौधरीले स्थानीय विपन्न तथा असहाय परिवारलाई चिसोबाट जोगाउने उद्देश्यले ४० थान कम्बल वितरण गरेका छन्। उक्त वितरण कार्यक्रम Brilliant Model English Boarding School, जगरनाथपुरको प्रांगणमा आज बिहान आयोजना गरिएको हो।
कार्यक्रमका क्रममा चौधरीले कम्बलसँगै विद्यालयमा अध्ययनरत साना बालबालिकालाई ८–८ पोकेटका दरले बिस्कुट तथा चाउ–चाउ पनि वितरण गरेका थिए। यस मानवीय पहलले स्थानीय समुदायमा सकारात्मक सन्देश प्रवाह गर्नुका साथै बालबालिकामा खुशी र उत्साह थपेको छ।
कार्यक्रमको समन्वय विद्यालयका सञ्चालक फजल करीले गरेका थिए। चौधरीले कार्यक्रम सफल बनाउन सहयोग पुर्याएकोमा करीप्रति विशेष धन्यवाद व्यक्त गरेका छन्।
चिसो मौसममा आवश्यक सामग्री पाउँदा स्थानीय बासिन्दाहरूले खुशी व्यक्त गर्दै समाजसेवी चौधरीको कार्यको खुलेर प्रशंसा गरेका छन्। यस प्रकारका सहयोगी कार्यक्रमहरूले समाजमा मानविय मूल्य, सहकार्य र सेवाभावको महत्त्वलाई अझ सुदृढ बनाउने विश्वास व्यक्त गरिएको छ।
