अभिलाष गुप्ता
वीरगंज, ०६ माघ । डि.ए.भी. केडिया स्कूलद्वारा सञ्चालित “श्री शंकरलाल केडिया स्मृति अन्तर–विद्यालय फुटबल प्रतियोगिता २०८२” अन्तर्गत आज प्रतियोगिताको पहिलो दिन दुई वटा रोमाञ्चक खेलहरू सम्पन्न भएका छन् ।
आज सम्पन्न पहिलो खेलमा साउथ जोन सेकेन्डरी स्कूलले उत्कृष्ट प्रदर्शन गर्दै जीवन ज्योति स्कूललाई ५–२ गोलको अन्तरले पराजित गरेको छ । खेलको सुरुदेखि नै आक्रामक रणनीति अपनाएको साउथ जोन सेकेन्डरी स्कूलले खेलमा पूर्ण नियन्त्रण राख्दै सहज जित हात पारेको हो । उक्त खेलमा साउथ जोन सेकेन्डरी स्कूलका ज्ञानराज चौधरी उत्कृष्ट प्रदर्शनका आधारमा म्यान अफ द म्याच घोषित भए ।
त्यसैगरी, दोस्रो खेलमा मनकामना सेकेन्डरी स्कूलले मेरीगोल्ड स्कूलसँगको प्रतिस्पर्धात्मक खेलमा टाइ–ब्रेकरमा ८–६ गोल अन्तरले विजय हासिल गरेको छ । निर्धारित समयमा दुवै टोली बराबरीमा रहेपछि खेल टाइ–ब्रेकरमा पुगेको थियो । टाइ–ब्रेकरमा मनकामना सेकेन्डरी स्कूलका खेलाडीहरूले उत्कृष्ट धैर्यता र कौशल प्रस्तुत गर्दै जित सुनिश्चित गरेका हुन् । उक्त खेलमा मनकामना सेकेन्डरी स्कूलका अमर कुश्वाहा ले म्यान अफ द म्याच को उपाधि प्राप्त गरे ।
प्रतियोगिताबारे जानकारी दिँदै D. A. V. R. B. केडिया स्कूलका प्रिन्सिपल राकेश मिश्राले यस प्रकारका प्रतियोगिताले विद्यार्थीहरूमा खेल भावना, अनुशासन तथा आपसी सद्भावको विकास हुने विश्वास व्यक्त गर्नुभयो । प्रतियोगिताका आगामी दिनहरूमा थप रोचक तथा प्रतिस्पर्धात्मक खेलहरू हुने उहाँले बताउनुभयो ।
