वीरगंज, १७ माघ । पर्सा जिल्ला क्षेत्र नम्बर–३ का प्रतिनिधि सभा उम्मेदवार रुपेश पाण्डेले क्षेत्रको समृद्धि र जनसुविधा सुनिश्चित गर्ने लक्ष्यसहित छ वटा मुख्य विकास एजेन्डा सार्वजनिक गर्दै चुनावी अभियान सुरु गरेका छन्। कृषि, स्वास्थ्य, शिक्षा, रोजगारी, पूर्वाधार र नागरिकको आवाजलाई राष्ट्रिय तहमा पुर्याउने योजनासहित उनी चुनावी मैदानमा उत्रिएका हुन्।
उम्मेदवार पाण्डेका अनुसार यी एजेन्डा कार्यान्वयन भए पर्सा–३ को दीर्घकालीन विकास र जनताको जीवनस्तरमा उल्लेखनीय सुधार आउने अपेक्षा गरिएको छ।
पाण्डेले कृषि आधुनिकीकरण अन्तर्गत कृषकलाई गुणस्तरीय मलखाद र बिउ उपलब्ध गराउने, आधुनिक कृषि प्रविधि प्रयोगका लागि तालिम तथा प्राविधिक सहयोग प्रदान गर्ने योजना रहेको बताए। परम्परागत खेतीलाई व्यावसायिक उत्पादनमा रूपान्तरण गर्दै नयाँ बाली, तरकारी, फलफूल तथा पशुपालनमा कृषकलाई प्रोत्साहन गरिने उनको भनाइ छ।
गुणस्तरीय स्वास्थ्य सेवा अन्तर्गत सबै गाउँपालिका तथा वडाका स्वास्थ्य संस्था र अस्पताललाई सुविधासम्पन्न बनाइने, पोखरिया जिल्ला अस्पताललाई सुदृढीकरण गरिने तथा आधुनिक उपकरणसहित डिजिटल र प्रविधिमैत्री स्वास्थ्य सेवा विकास गरिने योजना रहेको उनले जानकारी दिए।
त्यस्तै गुणस्तरीय शिक्षाका लागि विद्यालय सरसफाइ, विद्यार्थी–अभिभावक–शिक्षक अन्तरक्रिया कार्यक्रम, सीपमूलक शिक्षा, खेलकुद तथा अतिरिक्त क्रियाकलाप प्रवर्द्धन, साथै हाजिरीजवाफ, वादविवाद र वक्तृत्वकला प्रतियोगितालाई प्राथमिकतामा राखिने जनाइएको छ।
रोजगारी र उद्यमशीलता अन्तर्गत देशका प्रतिष्ठित उद्योगपतिलाई पर्सामा उद्योग स्थापना गर्न सहजीकरण गर्ने, स्थानीय स्रोत र सीपमार्फत रोजगारी सिर्जना गर्ने तथा युवालाई लक्षित सीप तालिम, उद्यमशीलता र स्वरोजगार कार्यक्रम सञ्चालन गर्ने योजना रहेको छ।
पूर्वाधार विकासमा सडक, पुल, ढल, विजुलीबत्ती लगायतका आधारभूत संरचनाको दिगो विकास, ग्रामीण र सहरी क्षेत्रलाई जोड्ने समावेशी पूर्वाधार निर्माण तथा विकास कार्यमा पारदर्शिता, गुणस्तर र समयपालन सुनिश्चित गरिने पाण्डेले बताए।
त्यसैगरी नागरिकको आवाजमा राष्ट्रिय ध्यानाकर्षण अन्तर्गत ९६ हजारभन्दा बढी मतदाता तथा क्षेत्रका नागरिकका हक–हितका विषयलाई संसद्, मन्त्रालय र नीति निर्माण तहसम्म पुर्याइने योजना रहेको छ। स्थानीय समस्या समाधानका लागि निरन्तर संवाद, सार्वजनिक सुनुवाइ र जवाफदेही प्रणाली लागू गरिने उनले स्पष्ट पारे।
उम्मेदवार रुपेश पाण्डेका अनुसार यी छ वटा एजेन्डा कार्यान्वयनले पर्सा–३ को समग्र विकास, जनसुविधा र दीर्घकालीन समृद्धिमा महत्वपूर्ण योगदान पुर्याउने विश्वास लिइएको छ।
