वीरगंज, १५ जेष्ठ । नेपाल पत्रकार महासंघ पर्सामा सदस्यता शुद्धीकरण तथा नयाँ सदस्यता वितरणको माग गर्दै गठित संघर्ष समितिले शुक्रबार महासंघको भवनमा तालाबन्दी गरेको छ। संघर्ष समितिका संयोजक अनुप तिवारीको नेतृत्वमा पत्रकारहरूको टोलीले महासंघको कार्यालयमा तालाबन्दी गरेको हो।
संघर्ष समितिले वर्तमान कार्यसमितिले सदस्यता शुद्धीकरण अभियानमा सहयोग नगरेको आरोप लगाउँदै पूर्वनिर्धारित कार्यक्रमअनुसार तालाबन्दी गरिएको जनाएको छ।
संघर्ष समितिका संयोजक अनुप तिवारीले महासंघ नेतृत्वले आन्दोलनका कार्यक्रमप्रति बेवास्ता गरेको आरोप लगाए। उनले भने, “हामीले ज्ञापनपत्र बुझायौं, एक–एक घण्टा महासंघको मूल गेटमा धर्ना दियौं, तर कार्यसमिति कानमा तेल हालेर बस्यो। हाम्रो मागहरू टार्ने काम मात्रै भयो।”
उनका अनुसार नेपाल पत्रकार महासंघ पर्साका कुल १६१ सदस्यको सदस्यता छानबिन गरी विधानअनुसार योग्य सदस्यहरूको नवीकरण गर्दै साधारणसभा गरिनुपर्ने संघर्ष समितिको एकसूत्रीय माग रहेको छ।
तालाबन्दी कार्यक्रममा संघर्ष समितिका सह–संयोजक शेखर छतकुल्लीसहित सदस्यहरू वीरेन्द्र साह ‘हिटलर’, मनोज कुमार मिश्र, राजेन्द्र सिंह, पन्नालाल साह, मंसुर खान, सन्तोष पटेल, कृष्ण श्रीवास्तव, राजन सिंह, बलिराम यादव, राजकुमार सरार्फ, अर्जुन गुप्तालगायतको सहभागिता रहेको थियो।
