दरभंगा, ०४ साउन । सार्क राष्ट्रहरूमा मानव अधिकार पत्रकारिता तथा मातृभाषा संरक्षणका क्षेत्रमा परिचित व्यक्तित्व डा. शशि भूषण कुमारले आगामी जुलाई २२, २०२६ मा भारतको बिहार राज्यस्थित दरभंगाको तारामण्डल सभागारमा आयोजना हुने बिहार राज्य बज्जिका विकास परिषदको ३१ औँ स्थापना दिवस समारोहमा अतिथिका रूपमा सहभागिता जनाउने भएका छन्।
परिषदका राष्ट्रिय अध्यक्ष ओंकार प्रसाद सिंह तथा संरक्षक प्राध्यापक ब्रह्मदेव प्रसाद कायले डा. कुमारलाई समारोहमा सहभागी हुन औपचारिक निमन्त्रणा पठाएको जनाइएको छ।
समारोहमा भारत सरकारका पूर्व केन्द्रीय मन्त्री मोहम्मद अली अशरफ फातमी, दरभंगा नगर निगमका पूर्व मेयर ओमप्रकाश खेरिया, चलचित्र अभिनेता अमित कश्यप, पद्मश्री राजकुमारी देवी ‘किसान चाची’, पद्मश्री सिवन पासवान, शिक्षाविद् राजाराम चौरसिया तथा वरिष्ठ साहित्यकार प्रा. हरिनारायण सिंह ‘हरि’ लगायत सयौँ विशिष्ट व्यक्तित्वहरूको उपस्थिति रहने बताइएको छ।
कार्यक्रममा डा. कुमारले आफ्नो मातृभाषा बज्जिकामै सम्बोधन गर्नेछन्। यसअघि उनले नेपालको काठमाडौंमा आयोजित अन्तर्राष्ट्रिय मातृभाषा पत्रकारिता सम्मेलनमा भारतको तर्फबाट तीन पटक बज्जिका भाषामै सम्बोधन गर्दै प्रतिनिधित्व गरिसकेका छन्। उक्त सम्मेलनमा नेपालकी पूर्वराष्ट्रपति विद्यादेवी भण्डारी तथा तत्कालीन उपप्रधानमन्त्री समेत उपस्थित थिए।
मातृभाषा पत्रकारिताको क्षेत्रमा पुर्याएको योगदानको कदरस्वरूप डा. कुमारलाई सन् २०२५ मा नेपालका मातृभाषा पत्रकारिताका अग्रणी धर्मादित्य धर्माचार्यको नाममा प्रदान गरिने “धर्मादित्य धर्माचार्य अन्तर्राष्ट्रिय मातृभाषा पत्रकारिता सम्मान–२०२५” बाट सम्मानित गरिएको थियो। उक्त सम्मान प्राप्त गर्ने उनी भारतका पहिलो व्यक्तित्व हुन्।
डा. कुमारले बज्जिका भाषा र संस्कृतिलाई लोकतन्त्रको पहिलो भूमि मानिने वैशालीबाट विश्वका १६० लोकतान्त्रिक मुलुकसम्म पुर्याउने संकल्प व्यक्त गरेका छन्। यस अभियानलाई अघि बढाउन उनले ‘वैशाली इन्टरनेशनल विद्यापीठ’ समेत स्थापना गरेका छन्।
