अभिलाष गुप्ता
वीरगंज, ०४ साउन । पर्सा जिल्लाको वीरगंज महानगरपालिका–१६ नगवास्थित वडा कार्यालयको नवनिर्मित भवनको पूजा तथा शुभारम्भ कार्यक्रम सोमबार सम्पन्न भएको छ। धार्मिक विधिअनुसार वैदिक मन्त्रोच्चारण सहित पूजा–अर्चना गरी भवनको औपचारिक शुभारम्भ गरिएको हो।
कार्यक्रममा वीरगंज महानगरपालिकाका प्रमुख राजेशमान सिंह प्रमुख अतिथिका रूपमा उपस्थित रहनुभएको थियो भने वडा नं. १६ का वडा अध्यक्ष प्रसुराम चौरसियाको अध्यक्षतामा कार्यक्रम सम्पन्न भएको थियो।
शुभारम्भ कार्यक्रममा जनप्रतिनिधि, विभिन्न राजनीतिक दलका प्रतिनिधि, स्थानीय अगुवा, समाजसेवी, बुद्धिजीवी तथा स्थानीयवासीहरूको उल्लेखनीय सहभागिता रहेको थियो। उपस्थित सबैले नवनिर्मित वडा कार्यालय भवनबाट नागरिकले अझ सहज, व्यवस्थित, छिटोछरितो र प्रभावकारी सेवा प्राप्त गर्ने विश्वास व्यक्त गरेका थिए।
कार्यक्रमलाई सम्बोधन गर्दै प्रमुख अतिथि मेयर राजेशमान सिंहले स्थानीय सरकारको मुख्य उद्देश्य नागरिकलाई गुणस्तरीय र सहज सेवा उपलब्ध गराउनु रहेको बताउँदै भौतिक पूर्वाधारको विकाससँगै सेवा प्रवाहलाई थप प्रभावकारी बनाइने प्रतिबद्धता व्यक्त गर्नुभयो। उहाँले आधुनिक सुविधा सम्पन्न वडा कार्यालयले जनताको दैनिक प्रशासनिक आवश्यकतालाई सहज बनाउने विश्वास व्यक्त गर्नुभयो।
त्यसैगरी वडा अध्यक्ष प्रसुराम चौरसियाले वडा कार्यालयको आफ्नै सुविधासम्पन्न भवन निर्माण सम्पन्न हुनु वडा नं. १६ का बासिन्दाका लागि महत्वपूर्ण उपलब्धि भएको बताउनुभयो। उहाँले आगामी दिनमा नागरिकमैत्री, पारदर्शी र उत्तरदायी सेवा प्रवाहलाई अझ सुदृढ बनाउने प्रतिबद्धता जनाउनुभयो।
स्थानीयवासीहरूले पनि नयाँ भवन सञ्चालनमा आएपछि सेवाग्राहीले सहज वातावरणमा सेवा पाउने, प्रशासनिक कार्यहरू छिटो सम्पन्न हुने तथा वडा कार्यालयप्रति नागरिकको विश्वास अझ मजबुत हुने अपेक्षा व्यक्त गरेका छन्।
धार्मिक वातावरणमा सम्पन्न भएको शुभारम्भ कार्यक्रममा पूजा–अर्चनापछि उपस्थित अतिथिहरू बीच शुभकामना आदानप्रदान गरिएको थियो। नवनिर्मित भवन सञ्चालनसँगै वडा कार्यालयको सेवा प्रवाह थप व्यवस्थित, प्रभावकारी र नागरिकमैत्री बन्ने अपेक्षा गरिएको छ।
