अभिलाष गुप्ता
वीरगंज, ०१ मंसिर । वीरगंज महानगरपालिका नगर प्रमुख राजेशमान सिंहको विशेष निर्देशनमा वी.म.न.पा.–१३ (साविक वडा नं. १६) मा अवस्थित सि.नं. ११३-०७ तथा कि.नं. २७ को सरकारी जग्गा र सो जग्गामा बनेको घर आज औपचारिक रूपमा खाली गराई महानगरपालिकाको नियन्त्रणमा लिइएको छ।
उक्त जग्गासम्बन्धी मुद्दा नं. ०७३–CR–0008 मा पर्सा जिल्ला अदालतले मिति २०७६-०२-१९ मा गरेको फैसला र भूमि सुधार तथा मालपोत कार्यालय पर्साले मिति २०८१-०५-३० मा दर्ता–खारेज (हा.सा.) सहित गरेको निर्णयले सो सम्पत्ति नेपाल सरकारको नाममा कायम भइसकेको थियो। यसै आधारमा महानगरपालिकाले मिति २०८२-०७-१७ का दिन प.सं. २०८२-०८३, च.नं. २१८६ मार्फत सात दिनभित्र घर–जग्गा खाली गर्न आग्रह गर्दै सूचना प्रकाशन गरेको थियो।
उक्त सूचनाअनुसार आज ताहा १३ का स्थानीय भद्रभलाद्मी, सो क्षेत्रका वडावासी तथा नेपाल प्रहरीले प्रत्यक्ष उपस्थितिमा मिति २०८२-०८-०१ गते अतिक्रमण हटाउने कार्य सम्पन्न गरियो। भौतिक पूर्वाधार अतिक्रमण नियन्त्रण समिति संयोजक प्रदीप कुमार चौरसिया, नगर प्रमुख सल्लाहकार हरि प्रसाद पोखरेल, नगर प्रहरी प्रमुख हरि भुसाल लगायतको सक्रिय पहलमा अतिक्रमित घर–जग्गा खाली गराई महानगरपालिकाले नियन्त्रणमा लिएको हो।
वीरगंज महानगरपालिकाले सार्वजनिक सम्पत्ति संरक्षण तथा अतिक्रमण नियन्त्रण अभियान निरन्तर रूपमा अघि बढाइने जनाएको छ।
