अभिलाष गुप्ता
वीरगंज, ११ माघ । प्याब्सन पर्साको आयोजनामा जारी अन्तर विद्यालय क्रिकेट र फुटबल प्रतियोगिता अन्तर्गत सम्पन्न विभिन्न क्रिकेट तथा फुटबल खेलहरूमा विद्यालयस्तरीय खेलाडीहरूले उत्साहजनक र प्रतिस्पर्धात्मक प्रदर्शन प्रस्तुत गरेका छन्। आज क्रिकेटतर्फ ३ र फुटबलका ४ खेल सम्पन्न भएका छन् ।
क्रिकेटतर्फ मुनलाईट स्कुलले मिनील्याण्डलाई ८४ रनले पराजित गर्दै प्रभावशाली जित दर्ता गर्यो। टस जितेर ब्याटिङ गरेको मुनलाईटले निर्धारित १५ ओभरमा ६ विकेटको क्षतिमा १४५ रन बनायो भने जवाफमा मिनील्याण्ड पुरै ओभर खेल्दा पनि ६१ रनमै समेटियो। यस खेलमा ४५ रनको महत्वपूर्ण योगदान दिएका दिलराज यादव म्यान अफ द म्याच घोषित भए।
यस्तै, दोस्रो खेलमा फुर्कान एकेडेमी विजयी भयो । नेपाल काभेरीले टस जितेर ब्याटिङ गरे पनि ६ विकेट गुमाउँदै ९५ रन मात्र बनाउन सक्यो र उक्त लक्ष्य फुर्कान एकेडेमीले २ विकेटको क्षतिमा १२.२ ओभरमै पूरा गर्दै ८ विकेटको जित हात पार्यो।
तेस्रो खेलमा सेन्ट जेभियर्सले विजयी भएको छ । सेन्ट जेभियर्सले टस जितेर ब्याटिङ गर्दै ८ विकेटको क्षतिमा १५२ रनको योगफल तयार गरेकोमा आचार्य एकेडेमी पुरै ओभर खेल्दा पनि ८४ रनमै सीमित रह्यो।
फुटबलतर्फ, गुरुकुल एकेडेमीले गोल्डेन फ्युचर माविविरुद्ध जित हात पार्यो । गोल्डेन फ्युचरका खेलाडीबाट भएको आत्मघाती गोल निर्णायक बन्यो र गुरुकुलका युहान राई म्यान अफ द म्याच बने। दोस्रो खेलमा ज्ञानदा एकेडेमीले नेपाल काभेरीलाई ३–२ ले पराजित गरेको हो । खेलको म्यान अफ द म्याच ज्ञानदाका अनुरन्जन साह भए। तेस्रो खेलमा बिकन माविले बीरगन्ज पब्लिक ई स्कुललाई ८–० को फराकिलो अन्तरले पराजित गर्यो । बिकनका अंश थारु म्यान अफ द म्याच घोषित भए। त्यसैगरी चौथो र अन्तिम खेलमा साउथ जोनले डिएभीलाई ५–० ले पराजित गर्दै विजयी भयो । खेलको म्यान अफ द म्याच साउथ जोनका आयुष चौधरी घोषित भए। सोको जानकारी फुटबलखेलका संयोजक एवं प्याब्सन पर्साका वरिष्ठ उपाध्यक्ष सुशिला साहले दिएकी थिईन।
