सामूहिक गायन तथा सांस्कृतिक प्रस्तुतिबाट गुञ्जियो राष्ट्रभक्तिको सन्देश
रक्सौल / वीरगंंज २७ साउन । भारतको राष्ट्रिय भावना तथा देशभक्तिको प्रतीक राष्ट्रगीत ‘वन्दे मातरम्’ को रचना भएको १५० वर्ष पूरा भएको अवसरमा भारतको महावाणिज्य दूतावास, वीरगंजले मंगलबार विशेष कार्यक्रम आयोजना गरेको छ। वीरगंजस्थित सैनिक ब्यारेकनजिक रहेको क्लासिक बैंक्वेटमा आयोजित उक्त कार्यक्रम सौहार्दपूर्ण तथा उत्साहपूर्ण वातावरणमा सम्पन्न भएको थियो।
‘मातृभूमिप्रति आध्यात्मिक तथा देशभक्तिपूर्ण समर्पण’को भावनाका साथ आयोजित कार्यक्रममा ‘वन्दे मातरम्’ को १५० वर्षको गौरवशाली यात्राको स्मरण गरिएको थियो। यस क्रममा यसको ऐतिहासिक, सांस्कृतिक तथा राष्ट्रनिर्माणमा रहेको योगदानबारे विस्तारपूर्वक प्रकाश पारिएको थियो। कार्यक्रममा ‘वन्दे मातरम्’ को सामूहिक गायनका साथै विभिन्न सांस्कृतिक तथा देशभक्तिपूर्ण प्रस्तुतिहरू प्रस्तुत गरिएका थिए।
कार्यक्रममा चिल्ड्रेन वर्ल्ड माध्यमिक विद्यालय, ज्ञानदा एकेडेमी वीरगंज तथा डीएभी आरबी केडिया विद्यालयका विद्यार्थीहरूले प्रभावशाली सांस्कृतिक तथा देशभक्तिपूर्ण प्रस्तुति दिँदै उपस्थित जनसमुदायमा राष्ट्रप्रेमको भावना सञ्चार गरेका थिए।
कार्यक्रमलाई सम्बोधन गर्दै वीरगंजका लागि भारतका महावाणिज्यदूत डी. एस. मीनाले ‘वन्दे मातरम्’ केवल एउटा गीत नभई भारतको स्वतन्त्रता आन्दोलन, राष्ट्रिय एकता, मातृभूमिप्रतिको सम्मान तथा गहिरो देशभक्तिको भावनासँग जोडिएको अमूल्य धरोहर भएको बताए। उनले यसको रचना भएको १५० वर्ष पूरा भएको यो ऐतिहासिक अवसर नयाँ पुस्ताका लागि यसको इतिहास, भावनात्मक महत्व तथा राष्ट्रप्रतिको समर्पण बुझ्ने महत्वपूर्ण अवसर भएको उल्लेख गरे।
महावाणिज्यदूत मीनाले नेपाल र भारतबीच शताब्दीदेखि कायम रहेको ऐतिहासिक, सांस्कृतिक तथा जनस्तरीय सम्बन्धलाई अझ सुदृढ बनाउन यस्ता कार्यक्रमहरूले महत्वपूर्ण भूमिका खेल्ने बताए।
कार्यक्रममा वीरगंज उद्योग वाणिज्य संघका उपाध्यक्ष माधव राजपाल, ज्येष्ठ नागरिक समाजका अध्यक्ष जगदीश शर्मा, नेपाल पत्रकार महासंघ पर्साका सदस्य राहुल गुप्ता, लायन्स क्लब इन्टरनेसनल डिस्ट्रिक्ट ३२२ ईका जोनल चेयरपर्सन तथा डिस्ट्रिक्ट चेयरपर्सन एवं भारत विकास परिषद्, रक्सौलका सेवा संयोजक तथा मिडिया प्रभारी बिमल कुमार सर्राफ, लायन राधेश्याम खेतान, लायन राजकुमार सिन्धी, लायन पिया सिंह, लायन गुड्डी जोशीसहित विभिन्न क्षेत्रका विशिष्ट व्यक्तित्व, उद्योगपति, व्यवसायी, समाजसेवी तथा स्थानीय नागरिकहरूको उपस्थिति थियो।
आफ्नो बधाई सन्देशमा भारत विकास परिषद् शाखा–रक्सौलका अध्यक्ष रजनीश प्रियदर्शीले देशबाहिर आयोजना हुने यस्ता कार्यक्रमले स्थानीय भारतीय समुदायसँगै त्यहाँका नागरिकलाई पनि भारतको गौरवशाली परम्परा तथा देशभक्तिको भावनाबारे जानकारी गराउने बताए। यस्ता कार्यक्रमले नेपाल र भारतबीचको आपसी सम्बन्धलाई अझ प्रगाढ बनाउनसमेत महत्वपूर्ण योगदान पुर्याउने उनले उल्लेख गरे।
उपस्थित सहभागीहरूले ‘वन्दे मातरम्’मा निहित राष्ट्रप्रेम, राष्ट्रिय एकता तथा मातृभूमिप्रतिको समर्पणको भावनालाई आत्मसात् गर्दै नेपाल र भारतबीच सदियौँदेखि कायम सामाजिक तथा सांस्कृतिक सम्बन्धलाई अझ सुदृढ बनाउनुपर्नेमा जोड दिए।
कार्यक्रमको सञ्चालन भारतको महावाणिज्य दूतावास, वीरगंज वाणिज्यदूत मनीष दासले गरेका थिए। विभिन्न सांस्कृतिक तथा देशभक्तिपूर्ण प्रस्तुति सहित कार्यक्रम सौहार्दपूर्ण तथा उत्साहपूर्ण वातावरणमा सम्पन्न भएको थियो।
