वीरगंज, १९ बैशाख । जिल्ला प्रहरी कार्यालय पर्साले मानव बेचबिखन तथा ओसार पसार कार्यमा सलंग्न एक जना पक्राउ गरेको जनाएको छ । वैशाख १७ गते वीरगंज महानगरपालिका वडा नं.१६ शंकराचार्य गेट स्थित सडकखण्डमा प्रहरी चौकी ईनर्वाको चेकिङ टोलीले नेपालबाट भारत जाँदै गरेका एक जना पुरूष र एक जना युवतीलाई सोधपुछ गरेको थियो । प्रहरी र आफन्त नेपालका कर्मचारीको उपस्थितिमा सोधपुछ गर्दा शंकास्पद देखिएकाले दुवैजनालाई जिप्रका, पर्सामा ल्याई प्रारम्भिक अनुसन्धान गर्दा निज युवतीलाई जिल्ला सिन्धुपाल्चोक चौतारा साँगाचोकगढी नगरपालिका वडा नं. १ बस्ने वर्ष २९ को सुजन लामा भन्ने पासाङ तामाङले वीरगंज नजिक कपडा कारखानामा राम्रो आम्दानी हुने काममा लगाईदिने भनि प्रलोभनमा पारी बेचबिखन गर्ने उद्देश्यले भारत लैजाँदै गरेको प्रहरीको दावी छ । सुजन लामा भन्ने पासाङ तामाङलाई नियन्त्रणमा थप अनुसन्धानको लागि मानव बेचबिखन तथा ओसार पसार (नियन्त्रण) ऐन, २०६४ बमोजिमको कसूरमा पर्सा जिल्ला अदालतबाट सात दिनको म्याद लिइ अनुसन्धान भइरहेको प्रहरीले जनाएको छ । प्रहरीले युवतीको नाम, ठेगाना गोप्य राखेको छ ।