अभिलाष गुप्ता
वीरगंज, १४ कार्तिक । वीरगंज महानगरपालिका–१६, नगवामा बस्ने करूल हकका करिब ३/४ वर्षका छोरा मोहम्मद अदनान घर नजिकै खेल्दै गर्दा हराएको घटनाले शुक्रबार वीरगंज क्षेत्रमा केही समय तनावपूर्ण वातावरण सिर्जना भएको थियो।
स्थानीयका अनुसार सानो साइकल लिएर घरबाट निस्केका अदनान घण्टाघर हुँदै आदर्शनगर लोहारपटी चौक आसपास खेल्दै हिँडिरहेका बेला परिवारजनले बालक हराएको जानकारी पाएपछि खोजी कार्य सुरू गरिएको थियो।
त्यही क्रममा ग्रीन सिटी सामुदायिक सेवा केन्द्रका सचिव ज्योति रुंगटा लाई स्थानीयले शंकास्पद रूपमा सानो बालक सडकमा एक्लै हिँडिरहेको देखेपछि खबर गरेका थिए। सचिव रुंगटाले उक्त बालकलाई ग्रीन सिटी सामुदायिक प्रहरी सेवा केन्द्रमा ल्याएर आवश्यक सोधपुछ गरे, तर बालकले नाम, थर र ठेगाना भन्न सक्न सकेन।
बालकको तस्बिर र साइकलको फोटो सचिव रुंगटाले आफ्नो फेसबुक अकाउन्टमार्फत सार्वजनिक गरेपछि, सामाजिक सञ्जालमार्फत सूचना फैलियो र केही समयमै बालकका अभिभावकले सम्पर्क गरी आफ्नो छोरा भएको पुष्टि गरे।
त्यसपछि ग्रीन सिटी सामुदायिक सेवा केन्द्रका सचिव ज्योति रुंगटाको रोहबरमा, बालकलाई सही सलामत उनका पिता करूल हकको जिम्मा लगाई पठाइएको अध्यक्ष जयप्रकाश खेतानले जानकारी दिए।
अध्यक्ष खेतानले बताए अनुसार, “यो घटना समुदाय, प्रहरी र नागरिकबीचको सहकार्यको उत्कृष्ट उदाहरण हो। यस किसिमको मानवीय र समयमै गरिएको पहलले कुनै ठूलो दुर्घटना हुनबाट जोगाएको छ।”
ग्रीन सिटी सामुदायिक सेवा केन्द्रले अभिभावकहरूलाई साना बालबालिकालाई बाहिर खेल्न जाँदा नजिकैबाट निगरानी गर्न र सावधानी अपनाउन अनुरोध गरेको छ।
