अभिलाष गुप्ता
वीरगंज, ०७ माघ । डी.ए.भी. आर.बी. केडिया स्कूल द्वारा सञ्चालित श्री शंकरलाल केडिया स्मृति अन्तर–विद्यालय फुटबल प्रतियोगिता २०८२ अन्तर्गत आज सम्पन्न खेलहरूमा रोमाञ्चक प्रतिस्पर्धा देखिएको छ।
आज सम्पन्न पहिलो खेलमा मूनलाइट सेकेन्डरी स्कूलले उत्कृष्ट प्रदर्शन गर्दै मोडर्न हाई स्कूललाई ५–१ गोलको फराकिलो अन्तरले पराजित गरेको छ। खेलको सुरुवातदेखि नै आक्रामक खेल प्रस्तुत गरेको मूनलाइटले खेलभरि नियन्त्रण कायम राख्दै सहज जित निकालेको हो। उक्त खेलमा मूनलाइट सेकेन्डरी स्कूलका अबुलेश गद्दीले प्रभावशाली प्रदर्शन गर्दै म्यान अफ द म्याचको उपाधि प्राप्त गरेका थिए।
त्यसैगरी, आजै सम्पन्न दोस्रो खेलमा लिटल फ्लावर स्कूलले डी.ए.भी. स्कूललाई ६–२ गोलको अन्तरले पराजित गरेको छ। दुबै टोलीबीच प्रतिस्पर्धात्मक खेल भए पनि लिटल फ्लावरले आक्रामक खेल रणनीतिका कारण स्पष्ट जित दर्ता गर्न सफल भयो। उक्त खेलमा लिटल फ्लावर स्कूलका दीपक यादव उत्कृष्ट प्रदर्शन गर्दै म्यान अफ द म्याच घोषित भए।
आज सम्पन्न खेलहरूको नतिजासँगै मूनलाइट सेकेन्डरी स्कूल र लिटल फ्लावर स्कूल प्रतियोगिताको सेमिफाइनल चरणमा प्रवेश गरेका छन्। प्रतियोगिता का आगामी खेलहरू अझै रोचक हुने अपेक्षा गरिएको आयोजकले जनाएको छ।
