वीरगंज, २१ माघ । पर्सा राष्ट्रिय स्वतन्त्र पार्टी (रास्वपा) पर्सा जिल्ला निर्वाचन क्षेत्र–२ का उम्मेदवार सुशील कुमार कानुले आज वीरगंज महानगरपालिका–३ अन्तर्गत छपकैया क्षेत्रमा पुगेर स्थानीय मतदातासँग प्रत्यक्ष संवाद गरेका छन्। घरदैलो तथा टोलस्तरीय भेटघाटका क्रममा उनले स्थानीयवासीका गुनासा, अपेक्षा र सुझावलाई ध्यानपूर्वक सुन्दै आफू जनताकै आवाज बोकेर अघि बढ्ने बताएका हुन्।
भेटघाटका क्रममा स्थानीयले शिक्षा, स्वास्थ्य, रोजगारी, सडक–नाला, खानेपानी, सरसफाइ तथा युवा रोजगारीका विषयमा आफ्ना समस्या र अपेक्षा राखेका थिए। कानुले यी सबै विषयलाई प्राथमिकतामा राख्दै संसद्मा पुगेपछि नीतिगत र व्यवहारिक समाधानतर्फ पहल गर्ने प्रतिबद्धता व्यक्त गरे।
“राजनीति भाषणमा सीमित हुनु हुँदैन, समाधान देखिने काम चाहिन्छ,” उम्मेदवार कानुले भने, “जनताले उठाएका वास्तविक समस्यालाई नीति र कार्ययोजनामा रूपान्तरण गर्नु नै मेरो लक्ष्य हो।” उनले पारदर्शिता, जवाफदेहिता र सुशासनलाई केन्द्रमा राखेर काम गर्ने र युवालाई अवसर सिर्जना गर्ने एजेन्डा अघि सारे।
स्थानीय मतदाताले प्रत्यक्ष संवादबाट उम्मेदवारको धारणा बुझ्न पाएको भन्दै सकारात्मक प्रतिक्रिया दिएका थिए। उनीहरूले नयाँ सोच र जिम्मेवार नेतृत्व आवश्यक रहेको उल्लेख गर्दै विकास र सुशासनका लागि व्यवहारिक पहल अपेक्षा व्यक्त गरे।
रास्वपा पर्सा–२ ले आगामी दिनहरूमा क्षेत्रका विभिन्न वडामा यस्तै जनसंवाद कार्यक्रमलाई निरन्तरता दिने जनाएको छ।
