वीरगंज, २४ माघ । पर्सा जिल्लाको निर्वाचन क्षेत्र नम्बर–३ अन्तर्गत पटेर्वा सुगौली गाउँपालिकामा नेकपा एमालेका प्रतिनिधिसभा सदस्य पदका युवा उम्मेदवार रूपेश कुमार पाण्डेको पक्षमा जनलहर तीव्र बन्दै गएको छ। फागुन २१ गते हुने प्रतिनिधिसभा निर्वाचन नजिकिँदै गर्दा आयोजित अगुवा कार्यकर्ता भेटघाट कार्यक्रममा देखिएको उत्साहजनक सहभागिताले पर्सा–३ मा परिवर्तनको संकेत दिएको छ।
कार्यक्रमलाई सम्बोधन गर्दै नेकपा एमालेका केन्द्रीय कमिटी उपमहासचिव तथा पूर्व मन्त्री योगेश भट्टराईले पर्सा–३ मा यसपटक परिवर्तन अवश्यंभावी रहेको दाबी गरे। उनले विकास, सुशासन र रोजगारी सिर्जनामा एमाले स्पष्ट कार्ययोजना सहित अघि बढिरहेको उल्लेख गर्दै मधेसको समग्र विकासका लागि एमालेको नेतृत्व आवश्यक रहेको बताए।
“नाराभन्दा कामको राजनीति” — रूपेश पाण्डे
युवा उम्मेदवार रूपेश कुमार पाण्डेले पर्सा–३ को आर्थिक, सामाजिक तथा भौतिक विकासलाई केन्द्रमा राख्दै आफ्नो विकास भिजन सार्वजनिक गरे। उनले शिक्षा, स्वास्थ्य, कृषि, उद्योग तथा युवाको रोजगारीलाई प्राथमिकतामा राखेर क्षेत्रलाई समृद्ध र आत्मनिर्भर बनाउने प्रतिबद्धता व्यक्त गरे। “अब नाराभन्दा कामको राजनीति आवश्यक छ,” भन्दै पाण्डेले जनताको विश्वासलाई प्रत्यक्ष विकासमा रूपान्तरण गर्ने संकल्प दोहोर्याए।
नेतृत्वको बाक्लो उपस्थिति
नेकपा एमाले पटेर्वा सुगौली गाउँपालिका कमिटी अध्यक्ष पुरण यादवको अध्यक्षता तथा केन्द्रीय उपमहासचिव योगेश भट्टराईको प्रमुख आतिथ्यमा सम्पन्न कार्यक्रममा पार्टीका केन्द्रीय कमिटी सदस्य तथा पर्सा जिल्ला इन्चार्ज प्रभु हजरा, केन्द्रीय सदस्य विजय सरावगी, केन्द्रीय सल्लाहकार परिषद सदस्य अरबिन्द सिंह, मधेस प्रदेश कमिटी उपाध्यक्ष बिचारी यादव, प्रदेश कमिटी सदस्यहरू, पर्सा जिल्ला अध्यक्ष विश्वम्भर शर्मा, सचिव महेश दाशलगायत नेताहरूको उल्लेखनीय सहभागिता रहेको थियो।
स्थानीय तहमा बढ्दो समर्थन
कार्यक्रममा वक्ताहरूले देशको राष्ट्रियता, स्थिरता र समृद्धिका लागि नेकपा एमालेको नेतृत्व अपरिहार्य रहेको धारणा व्यक्त गर्दै पर्सा–३ बाट योग्य, ऊर्जावान र विकासमुखी उम्मेदवारका रूपमा रूपेश कुमार पाण्डेलाई विजयी गराउन आह्वान गरे।
पटेर्वा सुगौलीमा देखिएको जनउत्साह र सहभागिताले पर्सा–३ मा एमालेको संगठनात्मक आधार थप मजबुत बन्दै गएको संकेत गरेको छ। विकास र समृद्धिको एजेन्डासहित चुनावी मैदानमा उत्रिएका युवा उम्मेदवार रूपेश कुमार पाण्डेप्रति जनविश्वास तीव्र रूपमा बढ्दै गएको देखिएको छ।
