अभिलाष गुप्ता
वीरगंज, ०९ चैत्र । वीरगंज उद्योग वाणिज्य संघले पर्सा जिल्लाबाट नवनिर्वाचित चारै जना प्रतिनिधिसभा सदस्यहरू लाई एक कार्यक्रमका बीच स्वागत तथा सम्मान गरेको छ । पर्साका चार निर्वाचन क्षेत्रबाट निर्वाचित सांसदहरू हरि पन्त क्षेत्र नं. १, सुशील कुमार कानु क्षेत्र नं. २, रामाकान्त चौरसिया क्षेत्र नं. ३ र टेक बहादुर शाक्य क्षेत्र नं. ४ लाई संघका अध्यक्ष हरी गौतमले सम्मान गरेका हुन्।
कार्यक्रममा राष्ट्रिय स्वतन्त्र पार्टी (रास्वपा) का तर्फबाट विजयी सांसदहरूले पर्साका चारै क्षेत्रमा उल्लेख्य मत प्राप्त गरेको उल्लेख गरिएको थियो । जसले जिल्लामा नयाँ राजनीतिक सन्तुलन र जनसमर्थनको संकेत दिएको सहभागीहरूले बताएका थिए।
उक्त कार्यक्रममा उद्योग वाणिज्य महासंघ मधेश प्रदेशका अध्यक्ष एवं कार्यसमिति सदस्य अशोक टेमानी लगायतका उद्योगी–व्यवसायीहरूको उल्लेखनीय सहभागिता रहेको थियो।
कार्यक्रममा बोल्दै संघका पदाधिकारीहरूले नवनिर्वाचित सांसदहरूसँग समन्वय गर्दै पर्साको आर्थिक विकास, व्यापार प्रवर्द्धन तथा उद्योग क्षेत्रका विभिन्न समस्याहरू समाधानका लागि सहकार्य गर्ने अपेक्षा व्यक्त गरेका छन्। साथै, निजी क्षेत्र र सरकारबीचको सहकार्यले जिल्लाको समग्र आर्थिक गतिविधिलाई थप गतिशील बनाउने विश्वास समेत व्यक्त गरिएको छ।कार्यक्रम सौहार्दपूर्ण वातावरणमा सम्पन्न भएको थियो।
